Nafta realizon fitime javore modeste – Mbështetet nga FED dhe nga parashikimet për rritjen e kërkesës

Çmimet e naftës po qëndrojnë në rritje edhe në sesionin e sotëm dhe pritet të realizojnë fitime e para javore në dy muajt e fundit. Tregu përfitoi nga parashikimi në rritje i Agjencisë Ndërkombëtare të Energjisë në lidhje me kërkesës për vitin e ardhshëm dhe nga dollari i dobët.

Nafta Brent e Londrës po tregtohet në rreth 77 dollarë për fuçi, ndërsa nafta Bruto amerikane po tregtohet në rreth 72 dollarë për fuçi. Nëse nuk do të ketë ndonjë surprizë gjatë ditës, të dyja kontratat pritet të realizojnë fitime modeste javore. Edhe njoftimi i Rezervës Federale për të ulur kostot e huamarrjes në vitin 2024, ofruan një mbështetje për çmimet.

Dollari amerikan preku nivelin më të ulët në 4 muajt e fundit të enjten, pasi presidenti i Rezervës Federale, Jerome Powell sinjalizoi se normat e interesit kanë arritur kulmin dhe do të ulen të paktën tre herë, vitin e ardhshëm.

Një dollar i dobët e bën naftën e denominuar në monedhën e gjelbër, më të lirë për blerësit e huaj. Ndërkohë, Banka Qendrore Evropiane paralajmëroi ndaj basteve për uljen e normave të interesit, duke riafirmuar se kostot e huamarrjes do të mbeten në nivele rekord pavarësisht pritjeve më të ulëta për inflacionin.

Ndër zhvillimet e tjera, Agjencia Ndërkombëtare e Energjisë deklaroi në raportin mujor se, konsumi botëror i naftës do të rritet me 1.1 milion fuçi në ditë, në vitin 2024, në rritje me 130,000 fuçi në ditë nga parashikimi i mëparshëm, duke përmendur një përmirësim të perspektivës për kërkesën e SHBA dhe çmimet më të ulëta të naftës.

Në anën tjetër, Organizata e Vendeve Eksportuese të Naftës (OPEC) parashikon se kërkesa do të rritet me 2.25 milionë fuçi në ditë, një shifër dyfish më e lartë se ajo e Agjencisë Ndërkombëtare të Energjisë. Por, të dhënat ekonomike nga Kina, që është konsumatori i dytë më i madh i naftës në botë, kanë shtuar presionin mbi çmimet në javët e fundit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.