Nafta zbret pranë 70 USD për fuçi – Prek nivelin më të ulët në 15 muajt e fundit
Nafta është kthyer në rënie të konsiderueshme në sesionin e sotëm europian, duke prekur nivelin më të ulët në 15 muajt e fundit, për shkak të shqetësimeve se sektori bankar global mund ta çojë botën drejt recesionit. Gjithashtu, edhe rritja e mundshme e interesave në Shtetet e Bashkuara po ushtron presion mbi çmimet. Nafta Brent e Londrës e ka nisur javën në rënie me rreth 2.3 dollarë dhe po tregtohet në rreth 70 dollarë për fuçi, niveli më i ulët që nga dhjetori i vitit 2021.
Gjatë javës së kaluar, ky bençmark ra me 12%. Nafta Bruto amerikane po tregtohet në rreth 64 dollarë për fuçi dhe vetëm sot ka rënë me mbi 2 dollarë. Javën e kaluar, kjo kontratë ra me 13%. Rënia e çmimeve të naftës vjen pavarësisht marrëveshjes historike mes UBS dhe Credit Suisse, për blerjen e kësaj të fundit për rreth 3.2 miliardë dollarë.
Ndërkohë, Rezerva Federale në SHBA pritet të rrisë normën bazë të interesit me 25 pikë bazë, pavarësisht thirrjeve të disa ekzekutivëve për të bërë një pauz me rritjen e interesave. Në fokus të tregjeve do të jetë edhe takimi mes OPEC dhe aleatëve të tjerë, me në krye Rusinë, që ndryshe njihen si OPEC+. Takimi do të mbahet më 3 prill dhe do të përcaktohet politikat e prodhimit në të ardhmen.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.