Ndryshimet në buxhetin 2023 – Balla: Parashikohet mbështetje me 700 milionë lekë për Policinë e Shtetit dhe Gardën e Republikës
Ministri i Brendshëm, Taulant Balla nëpërmjet një njoftimi në faqen e tij zyrtare është shprehur se, duhet një mbështetje dhe më e madhe për rritjen e standardit të jetesës të punonjësve të policisë dhe përmirësimin e kushteve të shërbimit të çdo punonjësi policie.
Sipas tij, kjo mbështetje duhet të jetë që nga kushtet financiare deri tek kushtet e strehimit kur shërbejnë jashtë vendbanimit apo krijojnë familje të reja, pa e harruar në asnjë moment sistemimin përfundimtar të të gjitha familjeve të policëve të vrarë në krye të detyrës, fëmijët e të cilëve janë fëmijët tanë.
Akti-normativ për ndryshimet në Buxhetin e Shtetit 2023, siguroi mbështetje financiare për një sërë detyrimesh të prapambetura ndaj punonjësve të Policisë së Shtetit dhe Gardës së Republikës, theksoi Balla.
Ministri i Brendshëm publikoi ndryshimet në buxhetin e shtetit 2023 që parashikojnë mbështetje për Policinë e Shtetit dhe Gardën e Republikës me 700 milionë lekë.
Në këtë mbështetje parashikohet, pagesa e lejeve të pakryera gjatë 2022 për 2017 punonjës policie.
Pagesa e shpenzimeve, orë pune jashtë orarit dhe dieta të Forcave Speciale, FNSH gjatë operacioneve policore.
Fondi i Posaçëm për shpërblimin e Policisë Kriminale dhe struktura të tjera të përfshira në operacione të rëndësishme.
Pagesa e detyrimeve kontraktuale për uniformat e policisë.
Pagesa e uniformave, ushqimit dhe blerja e materialeve speciale për Gardën e Republikës.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.