Në Rusi, me dashuri! – Depozita më e madhe e naftës në Irak, në duart e Moskës

Fusha më e madhe e naftës në 20 vitet e fundit në Irak është gati të bjerë në duart e Rusisë. Pas shumë vitesh punë të përbashkët, kërkime dhe nxjerrje të naftës së papërpunuar me kompaninë japoneze Inpex, Moska dëshiron t’i japë fund këtij partneriteti në mënyrë që të ketë kontrollin e plotë të këtij burimi nafte, i cili gjithashtu duket se përmban më shumë naftë bruto sesa besohej më parë. Sipas burimeve të OilPrice, kompania ruse Lukoil dhe Moska janë të gatshme të bëjnë pothuajse gjithçka për të mos e ndarë këtë fushë të pasur me një kompani të afërt me interesat perëndimore.

Puna kërkimore në bllokun 10 filloi në vitin 2012, u kryen studime sizmike 2D dhe 3D dhe u shpuan tre puse eksploruese dhe gjashtë puse vlerësuese. Pas vitesh pune të kryer, u zbulua se fusha Eridu mund të kishte rezerva të naftës bruto që i kalonin 10 miliardë fuçi. Ky është një nga zbulimet më të mëdha të naftës në Irak në 20 vitet e fundit, pohoi Lukoil.

Megjithatë, burime të larta të industrisë ruse të naftës zbuluan ekskluzivisht për OilPrice.com se shifra aktuale mund të jetë 50% më e lartë se vlerësimi origjinal. Kjo do të thotë, fusha mund të përmbajë deri në 15 miliardë fuçi naftë, më shumë bruto se të gjitha rezervat e konfirmuara në Guajana.

Megjithatë, ky zbulim ishte tashmë një domosdoshmëri në vetvete. Fusha Eridu  është gjetja më e madhe e naftës në Irak në 20 vitet e fundit. Rusia po bën gjithçka që mundet me aleatin e saj kryesor, Kinën. Kjo depozitë nafte është në përputhje me qëllimin e Moskës dhe Pekinit për të mbajtur Perëndimin jashtë marrëveshjeve energjetike në Irak, në një përpjekje për të joshur Bagdadin në boshtin e ri që po formojnë me Arabinë Saudite.

Miratimi dy javë më parë nga Ministria e Naftës në Irak për Inpex – kompania kryesore japoneze e naftës, një aleat kyç i Shteteve të Bashkuara, për të shitur 40% të aksioneve të saj në zonën e diskutueshme të Bllokut 10 që përmban fushën e madhe të Eridu-s, e lë rrugën të hapur që Lukoil të marrë kontrollin e plotë të të gjithë rajonit të pasur me naftë.

Lukoil kishte tashmë 60% të aksioneve në të gjithë Bllokun 10, me pjesën tjetër në duart e kompanisë japoneze. Megjithatë, që nga marsi ai ka kërkuar mënyra dhe formula për të hequr Inpex nga blloku dhe, bashkë me të, edhe gjurmët e fundit të ndikimit perëndimor në rajon. Shtypi aziatik e ka cilësuar si një “goditje” apo “përzënie” të kompanisë japoneze nga një fushë kyçe nafte.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.