Ngadalësohet sërish huadhënia në Eurozonë – Ulet ndjeshëm ritmi i rritjes së normës së interesit
Rritja e huadhënies për kompanitë e Eurozonës u ngadalësua përsëri në korrik, duke shtuar zërat se normat e larta të interesit po frenojnë krijimin e kredisë dhe rritjen ekonomike.
Kredia për kompanitë në bllokun e monedhës 20-vendeshe u zgjerua me 2.2% nga viti në vit pas një leximi prej 3% një muaj më parë, ndërsa rritja e kredisë për familjet u ngadalësua në 1.3% nga 1.7% në qershor, sipas një raporti të Bankës Qendrore Europiane.
BQE rriti normat e interesit për të nëntën herë radhazi në korrik, duke rritur normën që ajo paguan për depozitat e bankave nga 3.5% në 3.75%, niveli më i lartë që nga viti 2000, përpara se kartëmonedhat dhe monedhat euro të futeshin në qarkullim.
Me 5.3% në korrik, inflacioni mbetet shumë mbi objektivin e bankës dhe mund të duhet deri në vitin 2025 që të bjerë në objektivin prej 2%. Të dhënat ekonomike në gusht treguan se rënia e aktivitetit të biznesit në Eurozonë u thellua shumë më tepër sesa mendohej këtë muaj në një rënie të gjerë në të gjithë rajonin.
Treguesit e rritjes ekonomike po tregojnë një tkurrje në tremujorin e tretë, pavarësisht nga ai që mund të cilësohet si një sezon turistik rekord. Të dhënat e dobëta po intensifikojnë debatin se sa më shumë duhet të bëjë BQE.
Masa M3 e ofertës monetare, e parë në të kaluarën si një tregues i mirë i zgjerimit të ardhshëm ekonomik, u tkurr me 0.4% në korrik në një kthesë nga rritja prej 0.6% në qershor.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.