OSHEE, 11.4 mld lekë më shumë nga arkëtimet – Pavarësisht rënies së konsumit, gjatë 2022-it në total u mblodhën 81.2 mld lekë
Operatori i Shpërndarjes së Energjisë Elektrike rriti ndjeshëm vlerën e arkëtimeve në vitin 2022, pavarësisht se sasia e energjisë së konsumuar shënoi rënie në raport me një vit më parë. Sipas të dhënave zyrtare, gjatë vitit që shkoi OSHEE mblodhi rreth 81.2 mld lekë apo 11.4 mld lekë më shumë se viti 2021. Ndërkohë që, sasia totale e konsumuar vitin që shkoi ishte 7.9 mln mWh, nga 8.4 mln mËh që u konsumua periudhën janar – dhjetor 2021.
Kjo, rritje e vlerës së arkëtimeve të OSHEE shënohet pas rritjes së çmimit të energjisë elektrike për bizneset e lidhur në tensionit 20, 10 dhe 6 KV. Pavarësisht, se vitin që shkoi qeveria argumentoi shpesh se çmimi i energjisë elektrike nuk pësoi rritje, për këtë kategori energjia u shtrenjtua me 70%. Kjo, pasi rreth 7500 biznese u njoftuan se kishin plotësuar kushtet për të dalë në treg të lirë energjie, ndonëse procesi shtyhej prej vitesh.
Si pasojë e çmimeve të larta në tregje, nga kriza energjetike e shkaktuar nga lufta në Ukrainë, por edhe mosfunksionimit të bursës së energjisë elektirike, këta klientë u detyruan të furnizohen sërish nga OSHEE, nën rolin e Furnizuesit të Mundësisë së Fundit, por me çmime ndjeshëm më të larta.
Të ardhurat e OSHEE gjatë vitit që shkoi u rritën edhe nga aplikimi i kamtavonesave, si pasojë e pamundësia për të paguar në kohë faturat nga abonentët. Sipas të dhënave zyrtare, gjatë vitit 2022, OSHEE arkëtoi1.37 mld lekë nga rreth 4.6 mln fatura që nuk janë likujduar në kohë nga klientët që furnizon me energji elektrike.
Ola Mitre / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.