Pas 4 vitesh rikthehen bastet sportive? – Rama: Nëse po, vetëm online. Ylli: Po luhen në të zezë, fitimet të jenë për sportin

Katër vite pas mbylljes me ligj, qeveria po mendon rikthimin e basteve sportive por vetëm online. Ky mendim erdhi pas një dëgjese publike me drejtues të organizatave sportive në vendin tonë të cilët kërkojnë të veprohet sipas rregullave në vendet europiane, për të larguar bastet në të zezë dhe formalizimin e tyre.

‘Tani po luhet më shumë se më parë dhe shteti nuk ka asnjë kontroll, po luhet 20-30 mln lekë në javë, është një fenomen që unë kam thënë t’i mbyllim, po t’i mbyllim bastet në të zezë, t’i kontrolloj shteti dhe jo privati, nuk ka shtet që nuk ka kompani bastesh, si do i themi një qytetari europian që do të luajë, që ne s’e kemi ligjin, kam marrë shembuj nga ligjet e tjera që me një kartë identitet nuk mund të luajë më shumë se 500 euro, sot luhen me milion dhe sporti nuk po merr asnjë lekë, Komiteti Italian me % nga bastet, pra kur shtete europiane, i kanë këto ligje me standarte, po ne kaq të pasur jemi që t’i kontrollojë privati”, tha kreu i Komitetit Olimpik Shqiptar, Fidel  Ylli.

Pro rikthimit të basteve është dhe Kreu i Federatës Shqiptare të Futbollit, Armand Duka ku sipas tij fondet e përfituara nga menaxhimi i rregullt i basteve do të ndihmonin për infrastukturën e nevojshme për futbollit.

Ai u shpreh se ‘Duhet si një nevojë për financim që ka sporti, kjo është një mënyrë që ne mund të bëjmë diçka për sportin. I duam për të ndërtuar fushat, kryesisht në Tiranë, se jemi në një mungesë të madhe të infrastrukturës, ne nuk po u japim shqiptareve atë që duan dhe qeveria ka mundësi të tjera për t’ia dhënë fëmijëve infrastrukturën sportive, unë nuk besoj se plani 2 vjecar do na sjellë begati, kemi shumë punë për të bërë.’

Kryeministri Rama u shpreh se ky vendim do të shihet me pozitivitet. Rikthimi i basteve sportive sipas tij do të kryhet vetëm online dhe jo në salla e makineta dhe do të jetë në bashkëpunim me kompanitë ndërkombëtare.

SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.