Pasaportat e gjyqtarëve, Gjykata e Lartë rrëzon Qeverinë – Shfuqizohen si të paligjshme pikat e vendimit të vitit 2019 për pasaportat diplomatike

Gjykata e Lartë e ka konsideruar të paligjshëm vendimin e Qeverisë të marrë në vitin 2019 për heqjen e pasaportave diplomatike të gjyqtarëve. Në vendimin e zbardhur tashmë, Gjykata e Lartë ka argumentuar, se Qeveria ka cënuar një të drejtë të cilën gjyqtarëve ua siguron ligji.

Në fund të vitit 2019, Qeveria vendosi të bllokojë pasaportat diplomatike dhe ato të shërbimit për rreth 350 persona, mes të cilëve deputetë që u kishte mbaruar mandati, si dhe magjistratë të shkarkuar nga Vetting-u. Menjëherë Shoqata e Gjyqtarëve nisi një betejë ligjore kundër vendimit, e cila duket se ka përfunduar me sukses.

Në vendimin e zbardhur, Gjykata e Lartë konstaton cënimin e statusit të gjyqtarit nëpërmjet heqjes së pasaportës së shërbimit, me vendimin nr. 389, datë 12.6.2019, të Këshillit të Ministrave, “Për kriteret për lëshimin e pasaportës diplomatike dhe asaj të shërbimit”, si një e drejtë e fituar që nuk mund të ulet.

Më tej Gjykata vijon me Konstatimin e paligjshmërisë dhe shfuqizimin e lidhjes 2, të vendimit të Këshillit të Ministrave nr. 389, datë 12.6.2019, “Për kriteret për lëshimin e pasaportës diplomatike dhe asaj të shërbimit”, në pjesën që nuk parashikon gjyqtarët, si subjekte zyrtare që kanë të drejtë të pajisen me pasaportë shërbimi.

Po ashtu, gjykata vijon më tej me Konstatimin e paligjshmërisë dhe shfuqizimin e pikës 14, të vendimit të Këshillit të Ministrave të vitit 2019 në pjesën që parashikon se pasaportat e shërbimit të gjyqtarëve të lëshuara para datës 14 qershor 2019 humbasin vlefshmërinë më datë 31 dhjetor 2019.

Heqja e pasaportave diplomatike për 350 persona, mes tyre ish-deputetë që u ka mbaruar mandati ose gjyqtarë që nuk kanë kaluar procesin e vettingut, shoqëruesve të zyrtarëve ka qenë një vendim i marrë nga ministri i sapoemëruar atëherë në Punët e Jashtme, Gent Cakaj, vendim që kaloi në Këshillin e Ministrave disa muaj më vonë.

Lorenc Rabeta / SCAN

 

 

 

 

 

 

 

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.