Prodhimi i energjisë elektrike nga centralet bërthamore – Objektivi i Italisë: Deri në 2050-ën të mbulohet 11% e konsumit total të vendit
Dorina Kurtaj / SCAN
Kanë kaluar 35 vjet që kur Italia mbylli centralin e saj të fundit bërthamor, por çështja e prodhimit të energjisë është më aktuale se asnjëherë për shkak të objektivit të emetimeve zero. Prandaj, qeveria e kryeministres Georgia Meloni po rikonsideron rikthimin në përdorim të centraleve bërthamore, siç raportohet nga Financial Times. Në veçanti, Ministri i Mjedisit dhe Sigurisë së Energjisë, Gilberto Pizzetto Fratin i tha gazetës se Roma ka në plan të hartojë një ligj që do të lejojë investime në reaktorë të vegjël modularë bërthamorë që mund të jenë funksionalë brenda 10 viteve.
Ai shtoi se energjia bërthamore duhet të përfaqësojë të paktën 11% të konsumit total të vendit deri në vitin 2050, pasi Italia përpiqet të reduktojë varësinë e saj nga karburantet fosile të importuara.
Vendi ka ndërtuar tashmë katër termocentrale bërthamore në vitet 1960 dhe 1970 dhe kishte planifikuar një rritje ambicioze në kapacitetin e prodhimit të reaktorëve të tij. Megjithatë, aksidenti më i rëndë bërthamor në Çernobil në vitin 1986 në Bashkimin Sovjetik të atëhershëm ishte një pikë kthese. Në një referendum kombëtar që pasoi, italianët votuan me shumicë dërrmuese për t’i dhënë fund subvencioneve për ndërtimin e reaktorëve të rinj. Për shkak të klimës së fortë anti-bërthamore, Italia vendosi më pas të mbyllë të gjitha termocentralet e saj ekzistuese bërthamore, i fundit prej të cilëve pushoi së funksionuari në vitin 1990. Njëzet vjet më vonë, kryeministri i atëhershëm Silvio Berlusconi u përpoq të rifillonte programin e energjisë bërthamore të Italisë, miratimin e një ligji të ri dhe hartimin e kontratave për ndërtimin e reaktorëve. Përpjekja e tij u shkatërrua nga një referendum i vitit 2011, në të cilin më shumë se 90% e atyre që morën pjesë e hodhën poshtë planin e tij.
Në një sondazh të fundit mbi përdorimin e energjisë atomike nga organizata më e madhe mjedisore e Italisë ‘Legambiente’, 75% e 1000 të anketuarve shprehën rezervat e tyre nëse kjo është me të vërtetë një zgjidhje për problemet energjetike të Italisë. Dhe 25% janë kundër fuqimisht për arsye sigurie, megjithëse 37% thanë se energjia bërthamore do të ndihmonte Italinë nëse teknologjia do të ishte më e sigurt.
Për më tepër, Italia ka një ekspertizë të lartë në këtë fushë, me institucione kërkimore moderne dhe kompani italiane, aktive në zinxhirin e furnizimit bërthamor në tregjet e huaja. Promovimi i energjisë bërthamore nga Roma përkon me kufizimet e reja në instalimin e paneleve diellore, me kryeministren Giorgia Meloni që paralajmëroi se përhapja e tyre kërcënon sigurinë ushqimore të Italisë. Shumë italianë ankohen gjithashtu se panelet diellore prishin pamjen e fshateve piktoreske.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.