Tarifa të reja për produktet nga industritë kineze – Turqia, India dhe Brazili bashkohen në frontin kundër Kinës

Dorina Kurtaj / SCAN

Lufta tregtare duket se është zgjeruar përtej tërheqjes së luftës midis Uashingtonit dhe Pekinit ose midis Brukselit dhe Pekinit dhe po merr përmasat e një lufte ekonomike globale, por në thelb me të njëjtin kundërshtar. Javët e fundit, jo vetëm SHBA dhe BE, por edhe Turqia, Brazili dhe India dhe shumë vende të tjera kanë vendosur një breshëri tarifash për produktet nga industritë kineze. Dhe arsyeja është se Kina ka ‘trembur’ vendet në mbarë botën me vërshimin e eksporteve të makinave, pajisjeve elektrike, lodrave, rrobave, pra për çdo gjë që një konsumator mund të blejë.

Flota të mbushura me automjete elektrike, vëllime të mëdha pajisjesh shtëpiake dhe një sasi e pafund lodrash, veshjesh dhe çdo produkti të konsumit. Dhe gjithmonë me avantazhin konkurrues të çmimit të ulët. Eksportet e Kinës vazhdojnë të rriten dhe bashkë me ‘to edhe suficiti tregtar i ekonomisë së dytë më të madhe në botë.

Eksportet kineze u rritën sërish në qershor, ndërsa importet e saj ranë pasi familjet dhe bizneset në Kinë shfaqin njëfarë hezitimi dhe shmangien e shpenzimeve për shkak të problemeve me të cilat përballet ekonomia kineze. Konkretisht, eksportet u rritën me 8.6% në 308 miliardë dollarë, ndërsa importet ranë 2.3% në 209 miliardë dollarë gjatë të njëjtës periudhë, dhe rezultati ishte një suficit tregtar edhe më i madh.

Kështu muajin e kaluar suficiti tregtar i Kinës theu rekordin që kishte vendosur dy vjet më parë në korrik 2022, kur fabrikat kineze dhe portet kineze po punonin me ethe për të përmbushur kërkesën në rritje.

Konsumatorët në shumë vende të largëta blejnë shumë nga artikujt që kinezët nuk i blejnë më. Kjo i ndihmon fabrikat e Kinës të qëndrojnë të hapura dhe siguron kërkesën për njësitë e reja të prodhimit në ndërtim si pjesë e strategjisë kombëtare të Kinës për të rritur prodhimin industrial. Megjithatë, në të njëjtën kohë, autoritetet në mbarë botën janë të shqetësuara pasi të gjithë shohin eksportet e lira të Kinës që zëvendësojnë mallrat e tyre të prodhuara, duke i detyruar fabrikat e tyre të mbyllen dhe duke dëmtuar rritjen ekonomike. Kështu, në fund të qershorit, Turqia njoftoi se po vendos tarifa prej 40% për të gjitha automjetet kineze. Pak ditë më vonë India, e cila që nga fillimi i vitit kishte vendosur detyrime ‘anti-dumping’ për importet kineze të pjesëve të automjeteve, duke përfshirë frenat hidraulike, vendosi një seri të re tarifash që varionin nga 4.55 për qind në 162.5 %. Disa javë më parë, Brazili vendosi të rrisë tarifat për automjetet elektrike të importuara nga Kina nga 10% në janar në 18% në korrik, me perspektivën e rritjes në 35% në korrik 2026.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.