Shtohen anëtarët në fondet e pensioneve private dhe të investimeve – Rreth 47,33% e tregut të sigurimeve dominohet nga kapital i huaj

Ledina Elezi/SCAN

Të ardhurat nga primet e shkruara bruto të sigurimit të jetës dhe jo-jetës arritën në 22 miliardë lekë në fund të vitit 2023, ndërsa primi i fituar neto ishte 18 miliardë lekë. Sipas Raportit të Mbikëqyrjes, totali i aktiveve nga sigurimet e jetës dhe jo-jetës kap shifrën 50 miliardë lekë, një rritje kjo me përafërsisht 16% krahasuar me vitin paraardhës.

Nëse i referohemi strukturës së kapitalit sipas vendit të origjinës, mund të thuhet se 63,62% e kapitalit të shoqërive të sigurimit është i brendshëm, ndërsa 36,38% e kapitalit është austriak. Rreth 52.67% e tregut të sigurimeve dominohet nga kapital shqiptar, ndërkohë që 47,33% e tregut dominohet nga kapital i huaj.

Në Shqipëri operojnë 6 shoqëri administruese të fondeve të pensioneve private dhe të fondeve të investimeve. Numri i anëtarëve në fondet e pensioneve private do të rritej me 4.55% në fund të vitit 2023. Kështu, nga 36,518 anëtarë që numëroheshin në vitin 2022, kjo shifër do të shkonte në 38,180. Asetet neto të fondit të pensioneve kapën shifrën 6,7 miliardë lekë, me një rritje prej 18.22% krahasuar me vitin paraardhës, ndërsa totali i investimeve arriti në 6.4 miliardë lekë.

Sa i takon fondeve të investimeve, numri i anëtarëve arriti nga 28,949 që ishin në vitin 2022 në 32,180, duke shënuar kështu një rritje prej 11,16%. Vlera e aseteve neto të fondeve të investimeve ishte 45 miliardë lekë në fund të vitit 2023. Për sa i përket fondit të investimeve alternative, ku aktualisht në Shqipëri ushtrojnë aktivitetin vetëm dy prej tyre, vlera totale e investimeve ishte gati 5 miliardë lekë, një rritje kjo me 8% llogaritur me vitin pararendës.

Shoqëritë administruese të fondit të pensioneve dhe të sipërmarrjeve të investimeve kolektive fituan mbi 678 milionë lekë të ardhura vetëm nga administrimi i fondit.

Numri i anëtarëve të fondeve të pensioneve private

2022                        2023

36,518                   38,180

Numri i anëtarëve të fondeve të investimeve

2022                        2023

28,949                   32,180

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.