Qiratë në Turqi, më të shtrenjta se në Manhatan – Guvernatorja e Bankës Qendrore kthehet të jetojë me prindërit

Imazhi që kemi zakonisht për zyrtarët e lartë të çdo vendi është se të paktën financat e tyre janë gjithmonë në gjendje shumë të mirë. Pra, do të ishte e paimagjinueshme të mendohej se guvernatori i Bankës Qendrore të një vendi do të kishte vështirësi të gjente një shtëpi sepse qiratë janë shumë të larta! E megjithatë kjo është pikërisht ajo që duket se ka ndodhur në rastin e Hafiz Gaye Erkan, kreut të Bankës së Turqisë, e cila që nga qershori i kaluar, pas zgjedhjeve presidenciale dhe parlamentare që sollën Erdoganin në pushtet, u largua nga SHBA dhe mori përsipër pozicionin e kreut të Bankës Qendrore të Turqisë.

Ajo është gruaja e parë në historinë e Turqisë që mban këtë post. Një pozicion me rrezik të lartë për një grua 44-vjeçare të diplomuar në Princeton me një stazh dhjetë-vjeçar në Goldman Sachs dhe pozicione të tjera të profilit të lartë në Ëall Street. E megjithatë Erkan dhe i shoqi nuk mundën të gjenin një shtëpi me qira për të qëndruar me një çmim të arsyeshëm. Ajo shprehet se qiratë janë tmerrësisht të shtrenjta në Stamboll. Madje më shtrenjtë se në Manhattan. Kështu ajo vendosi që të jetojë me prindërit e saj dhe bashkëhsortin në një shtëpi.

Në një deklaratë për mediat ajo theksoi se aktualisht po drejton një betejë të vendosur kundër inflacionit. Sipas saj aktualisht po vazhdohet me një politikë specifike dhe me hapa specifikë.

Kreu i Bankës Qendrore të Turqisë tha se qëllimi i qeverisë është që inflacioni të bjerë në 14% deri në fund të vitit 2025 dhe në njëshifror deri në vitin 2026. Por qiratë janë një problem krejtësisht tjetër me dinamikën e tyre. Për situatën e qirave të pakontrolluara në qytetet metropolitane, si Stambolli, Erkan nuk ka një formulë për t’i dhënë zgjidhje. Në të vërtetë, çështja është e ndërlikuar. Në një ekonomi të tregut të lirë, por me një sistem të kufizuar kontrolli dhe me një akumulim të madh të popullsisë në qytetet e mëdha, dhe për rrjedhojë kërkesës për banesa, pak mund të bëhet. Për të qetësuar disi situatën, qeveria turke kufizoi rritjen e qirasë në 25%, por kjo rezultoi me pronarët të dëbonin qiramarrësit në mënyra të ndryshme mashtruese për të vendosur qira më të larta për qiramarrësit e rinj.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.