Qytetet ku do rishikohen tarifa e ujit – Reforma/Bashkimi i 12 bashkive në 3 shoqëri, aktmarrëveshje për shlyerjen e borxheve
Bashkimi i 12 bashkive në 3 shoqëri ujësjellësish do të pasohet me rishikimin e tarifave të ujit të pijshëm dhe largimit të ujërave të ndotur. 2 javë pas nënshkrimit të marrëveshjeve për krijimin e Subjekteve me Kompetenca të Përbashkëta, TV SCAN zbardh disa nga pjesët e relacionit, që shoqëroi vendimin e qeverisë për riorganizimin e sektorit, ku ndër të tjera theksohet se 1 nga objektivët kryesorë të reformës është pikërisht harmonizimi gradual i tarifave në zonën e shërbimit sipas ndarjeve territoriale të bashkive.
Referuar marrëveshjeve të nënshkruara deri më tani, ujësjellësi i Durrësit, tashmë përfshin edhe Shijakun, Krujën, Kavajën dhe Rrogozhinën; ujësjellësi i Korçës, ka në përbërje edhe Devollin, Ersekën, Maliqin dhe Pustecin, ndërsa Ujësjellësi i Pogradecit është bashkuar me Prrenjasin. Aktualisht, në secilin prej këtyre qyteteve aplikohen tarifa të ndryshme për ujin e pijshëm dhe largimin e ujërave të ndotur. Ndërkohë që, me krijimin e Ujësjellësve të bashkuar, shoqëritë e reja do të duhet të aplikojnë pranë Entit Rregullator të Ujit për tarifa të reja, teksa në fillim të vitit ky dikaster miratoi edhe metodologjinë e re të përllogaritjes të tyre nën metodën “çmimi tavan”, që parashikon që nga pagesat e ujit, të mbulohen jo vetëm nevojat për të ardhura të shoqërisë, për mbulimin e kostove të operimit, por edhe mbulimin e kostove të investimeve që kryhen nga ujësjellësit. Ndërkaq, paralelisht me ndryshimin e tarifave, një tjetër objektiv i reformës së ujit është edhe hartimi i programit për administrimin e borxheve, ku ndër të tjera përfshihet administrimi eficent i borxhit përmes marrëveshjeve të shlyerjes të dakordësuar me konsumatorët debitorë.
Një skemë e ngjashme u ndoq edhe në reformën e energjisë elektrike, ku klientët debitorë nënshkruan aktmarrëveshje me OSHEE-në për likujdimin me këste të faturave të papaguara. Riorganizimi i sektorit të ujësjellës-kanalizimeve parashikon krijim e 15 Subjekte me Kompetenca të Përbashkëta, nga 58 kompani që janë aktualisht, teksa Ministria e Infrastrukturës dhe Energjisë do të zotërojë 51% të aksioneve. Gjithsesi, për krijimin e tyre nevojitet dakordësia e të gjitha bashkive, duke qenë se do të duhet të heqin dorë nga aksionet që zotërojnë aktualisht.
Ola Mitre / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.