Qytetet më të ndotura të Europës – Ja destinacionet me cilësinë më të mirë dhe më të keqe të ajrit këtë verë

Shifrat e reja tregojnë se ndotja e ajrit është rritur rreth vijës bregdetare të Mesdheut Jugor muajin e kaluar.

Ishte veçanërisht e keqe në Spanjën jugore dhe Italinë me qytetet e mëdha që regjistronin matjet më të këqija, sipas kompanisë Airly për monitorimin e cilësisë së ajrit.

Problemi më i madh gjatë stinës së verës është përqendrimi më i lartë i oksidit të azotit nga trafiku i shtuar në këto zona.

“Ndër shumë qytete në vijën bregdetare, më të ndoturit janë në brigjet e Spanjës, që janë rajonet e Murcias, Barcelonës dhe Malaga-s, por edhe në bregdetin e Detit të Zi të Nessebar dhe Italisë si Pulia, Marche dhe Campania”, thotë Wiktor Warchałowski, CEO i Airly.

“Arsyeja për këtë mund të jetë një rritje mjaft e madhe e temperaturës e cila u vu re në pjesën e dytë të qershorit 2022”.

Ai thotë se ekspozimi afatgjatë dhe afatshkurtër ndaj ndotjes së ajrit është shoqëruar me ndikime në shëndet.

“Ekspozimi ndaj niveleve të larta të ndotjes së ajrit mund të shkaktojë rezultate të ndryshme shëndetësore. Cilësia e dobët e ajrit rrit rrezikun e infeksioneve të frymëmarrjes, sëmundjeve shëndetësore dhe kancerit të mushkërive.”

Një nga vendet më të ndotura, sipas Airly, është Athina e ndjekur nga Barcelona dhe Milano. Matjet shërbejnë si një paralajmërim për ata që duan të vizitojnë këto destinacione të njohura pushimesh këtë vit.

“Është ndoshta më mirë të shmangni këto qytete,” thotë Warchałowski.

Ku është cilësia e mirë e ajrit në Evropë?

Megjithatë, nuk është gjithçka një lajm i keq. Warchałowski thotë se hulumtimi i Airly zbuloi disa pjesë të Evropës me nivele të ndotjes së ajrit nën nivelet e rekomanduara ditore.

Alpet, për shembull, të cilat janë të famshme për ajrin e tyre shumë të pastër, ishin brenda kufijve të sigurt.

“Ne vumë re se cilësia më e mirë e ajrit në bregdetin e Balltikut ishte në qytetet në Poloni dhe Gjermani, si dhe në bregun jugor të Britanisë së Madhe në Southampton. Këto janë ndoshta vendet më me erë,” thotë Warchałowski.

“Rezultate mjaft të mira janë shënuar edhe në bregdetin verior të Italisë, Sllovenisë, Kroacisë, Greqisë dhe në pellgun e Detit të Zi, me përjashtim të Bullgarisë.”

Këto zona, shton ai, janë ndoshta më të sigurtat për të udhëtuar.

N.Xh / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.