Rriten me 30% gjobat për ndotësit e mjedisit – Shalsi: Të forcohen strukturat për menaxhimin e mbetjeve

Rritja e gjobave me 30% për bizneset dhe individët që ndotin mjedisin, duhet të shoqërohet me forcimin e kapaciteteve administrative për menaxhimin e tyre. Ky ishte fokusi i mbledhjes më të fundit të Komisionit parlamentar për Ekonominë dhe Financat, ku u diskutuan dy projektligjet lidhur me mbrojtjen e biodiversitetit dhe menaxhimin e integruar të mbetjeve.

Ministrja e Shtetit për Standardet dhe Shërbimet, Milva Ekonomi, theksoi që forcimi i këtyre masave vjen si rrjedhojë e sugjerimeve të ekspertëve dhe qytetarëve gjatë procesit të konsultimit publik të këtyre akteve.

“Këto dy ligje që ne shqyrtojmë sot, edhe natyrisht që ndjekin të gjithë protokollin që vjen nga rregullorja e kuvendit, pësojnë ndryshime për arsye të një konsultimi publik që ka ndodhur në periudhën 19 janar – 31 mars 2022. Të anketuarit që u pyetën, treguan që ka nevojë për ashpërsimin e masave, jo vetëm për sa i takon subjekteve, por edhe individëve që ndotin hapësirat publike.”

Kundër rritjes së gjobave ishte deputetja e Partisë Demokratike, Jorida Tabaku, e cila nënvizoi se problemi është paaftësia në menaxhimin e mbetjeve të territorit.

“Mua nuk më pëlqen fare kjo filozofia që, ka informalitet dhe hajde të rrisim gjobat, ka informalitet dhe hajde ndryshojmë ligjin, rrisim taksat. Cfarë është kjo? Se është e paaftë administrata për të kontrolluar territorin, për të menaxhuar territorin, për të menaxhuar mbetjet?”

Gjatë kësaj mbledhje, Kryetari i Komisionit, Eduard Shalsi, shtoi se këto ndryshime ligjore duhet të shoqërohen edhe me forcimin e strukturave që do të merren me menaxhimin e tyre.

“Përveçse pjesës së rritjes së masave apo ashpërsimit të penaliteteve, domosdoshmëria qëndron dhe te strukturat të cilat duhen përgatitur, organizuar, duhen aftësuar dhe trajnuar, në mënyrë që të jenë sa më efikase.”

Qëllimi i këtyre dy projektligjeve është ndërgjegjësimi i qytetarëve mbi mbrojtjen e mjedisit dhe ruajtjen e habitateve natyrore, të florës dhe faunës, përmes ashpërsimit të masave administrative.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.