Rritet çmimi i energjisë në Maqedoninë e Veriut: Nga 1 korriku tarifa mesatare për 98,8% të konsumatorëve do të rritet mesatarisht 7,4%!

Komisioni Rregullator i Energjetikës dhe i Shërbimeve të Ujit në Maqedoninë e Veriut ka vendosur që çmimi mesatar i energjisë elektrike për 98,8% të konsumatorëve të rritet mesatarisht 7,4% duke nisur nga 1 korriku.

“Me këtë reformë të sistemit tarifor mbrohen kategoritë më të ndjeshme”, deklaroi Marko Bislimoski, kryetar i Komisionit Rregullator. Sipas tij, çmimet e reja për furnizuesin universal EVN HOME SHPK Shkup, që do të jenë në fuqi nga data 1 korrik 2022, janë hartuar në mënyrë të shkallëzuar sipas blloqeve. Në këtë mënyrë, ata që shpenzojnë më pak energji elektrike do të paguajnë çmim më të ulët. E kundërta do të ndodhë me abonentët që konsumojnë më shumë.

Tarifat sipas blloqeve (kWh)

Blloku i parë 0- 210, rritja 5,5%

Blloku i dytë 210- 630, rritja 10,3%

Blloku i tretë 630- 1050, rritja 18,3%

Blloku i katërt 1050 >, rritja 138,7%

Sipas blloqeve, gjatë dimrit 59,9% e konsumatorëve do të kenë fatura më të larta për 6,6 %, ndërsa 35,5% do të kenë fatura më të larta nga 6,6% deri më 8,8%, 3,4% e konsumatorëve do të paguajnë fatura më të larta nga 8,8% deri më 11,2% dhe vetëm 1,2% e konsumatorëve do të paguajnë fatura më të larta nga 11,4% deri më 99,5%.

FATURAT GJATË DIMRIT

59.9% e konsumatorëve do të kenë rritje 6.6%

35.5% e konsumatorëve do të kenë rritje 6.7% deri 8.8%

3.4% e konsumatorëve do të kenë rritje 8.8% deri 11.2%

1.2% e konsumatorëve do të kenë rritje 11.4% deri më 99.5%

Gjatë periudhës së verës, sipas blloqeve, 77,2% e konsumatorëve do të paguajnë fatura më të larta për 6,7%, ndërsa 21,8% do të paguajnë fatura më të larta nga 6,7% deri më 8,8%. Vetëm 0,7% e konsumatorëve do të kenë fatura më të larta nga 8,8% deri më 11,3% dhe 0,2% e konsumatorëve do të paguajnë fatura më të larta nga 11,4% deri më 100%.

FATURAT GJATË VERËS

77.2% e konsumatorëve do të kenë rritje 6.7%

21.8% e konsumatorëve do të kenë rritje 6.7% deri 8.8%

0.7% e konsumatorëve do të kenë rritje 8.8% deri 11.3%

0.2% e konsumatorëve do të kenë rritje 11.4% deri 100%

Kompanitë energjetike kërkuan rritje të konsiderueshme të tarifave për shërbimet e tyre, por Komisioni Rregullator nuk I pranoi kërkesat e tyre dhe miratoi përqindje shumë më të ulëta. Shpenzimet për prokurimin e energjisë elektrike të EVN HOME në nivel vjetor janë rritur 57,4 milionë euro, në raport me atë që është planifikuar në dhjetor të vitit 2021, për shkak të kthimit të një numri të madh të kompanive dhe institucioneve publike nga tregu i lirë në tregun e rregulluar të energjisë elektrike. Në këtë mënyrë, kjo kompani ka importuar energji elektrike shtesë në shumën prej 33,2 milionë euro. Me ndërprerjen e gjendjes së krizës, EVN HOME ka shpenzime shtesë për burimet e rinovueshme të energjisë prej 9,5 milionë euro.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.