Rritje vjetore pagash deri në 2027 – Çfarë parashikon Banka e Greqisë gjatë katër viteve të ardhshëm?

Kristi Ceta/SCAN

 

Greqia parashikon rritje vjetore të pagave nga 4.8% deri në 5.3% gjatë katër viteve të ardhshme për të arritur objektivat e qeverisë për vendosjen e pagës minimale në 950 € në vitin 2027 dhe pagën mesatare në 1,500 €.

Sipas kuadrit të strategjisë afatmesme fiskale, ritmi i rritjes së pagës minimale do të jetë rreth 40 euro në vit, në mënyrë që gradualisht të rritet nga 830 euro në 2024 në 950 euro në 2027.

Prandaj, synimi i qeverisë parasheh formimin e pagës mesatare prej 1,500 euro në fund të katër viteve. Arritja e këtij qëllimi kërkon rritje afër 5.3%, pra rritja vjetore duhet të shkojë mbi 60 euro. Paga mesatare në 2024 pritet të rritet në 1,313.55 euro nga 1,251 në 2023. Në 2025 do të rritet në 1,379.22 euro, vitin më pas në 1,448, për të arritur në 1520.50 euro në 2027.

Mungesa e kontratave kolektive të punës krijon një vështirësi shtesë në formimin e pagës së re mesatare, pasi grupe të mëdha punëtorësh nuk nënshkruajnë kontrata prej disa vitesh, duke rezultuar pranë kufijve të pagës minimale.

Rritje mesatare rreth 5% në vit për vitet e ardhshme parashikon edhe Banka e Greqisë në raportin e saj. Norma e rritjes e parashikuar nga banka qendrore është 5.8% këtë vit, 4.9% në 2025 dhe 5.1% në 2026.

Në të njëjtën kohë, Banka e Greqisë në raportin e fundit për Politikën Monetare parashikon rritje pagash me mesatarisht 5% për vitet e ardhshme, duke theksuar se kompanitë do të detyrohen të rrisin pagat e punonjësve, nga njëra anë për t’i mbajtur ata në pozicionet e tyre, dhe nga ana tjetër për të tërhequr aftësi dhe kualifikime që janë në mungesë dhe që ndikojnë në konkurrencën dhe përfitimin e vetë kompanive.

Siç thuhet në raport, “pagat nominale për punonjës do të rriten kryesisht si rezultat i shtrëngimit në rritje në tregun e punës, por edhe bazuar në marrëveshjet e fundit kolektive të punës në degë të ndryshme të sektorit privat”.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.