Sa e “italianizuar” është ekonomia shqiptare? – Analiza/ Nga investimet dhe bizneset, deri tek numri i lejeve të qendrimit

Pushime, biznese, pasuri të paluajtshme…

Këto janë aktivitetet që vitet e fundit po njohin më shumë prezencë italiane në Shqipëri. Vendi ynë po promovohet gjerësisht nga vetë italianët si një vend me potencial të lartë zhvillimor.

Por cila është situata reale? Sa italianë kanë ardhur në Shqipëri vitet e fundit për të investuar dhe jetuar?

Fillimisht duhet evidentuar një nga komunitetet më me peshë në vendin tonë ai italian. Sipas të dhënave të INSTAT, të përpunuara nga SCAN Intel, në harkun kohor të 25 viteve, dy vitet e fundit kanë prekur rekord absolut të vizitorëve nga Italia.

Por cili është kontributi real i Italisë në Shqipëri?

Le të analizojmë si fillim investimet e huaja direkte. Italia ka qenë investitori i dytë më i madh në Shqipëri përgjatë vitit 2023 me fluks investimesh deri në 203 milionë euro. Ky fluks është rritur me gati 49%, krahasuar me vitin 2022.

Por sa italianë bëjnë biznes në Shqipëri?

Sipas të dhënave të Regjistrit Kombëtar Tregtar, rezultojnë 5775 biznese me të paktën një ortak (individ ose shoqëri) me shtetësi italiane me status aktiv, që operojnë në Shqipëri. Po të analizojmë më në detaje shifrat shohim se nga këto kompani 4,605 kompani janë 100% të huaja dhe 1,170 janë të përbashkëta.

Veç hapjes së bizneseve, rezulton se në vitet e fundit ka një shtim të numrit të italianëve që punojnë dhe jetojnë në Shqipëri. Të dhënat e Ministrisë së Brendshme tregojnë se 3953 shtetas italianë janë aktualisht në Republikën e Shqipërisë me leje qëndrimi.

Ky numër është rritur krahasuar me vitin 2022, kur regjistroheshin rreth 2948 shtetas italianë në Shqipëri. Pra, përgjatë vitit 2023, kanë aplikuar për leje qëndrimi për herë të parë 1005 shtetas italianë.

Ndërkohë, vlen të ritheksohet se Italia është partneri kryesor tregtar i Shqipëri duke zënë peshën më të madhe. Në vitin 2023 eksportet me Italinë arritën në 189 miliardë lekë.

Xhorxhina Deda / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.