Sa karburant konsumojnë shqiptarët? – Rritet importi me 9.200 ton. Ecuri pozitive edhe për birrën e cigaren

Qytetarët shqiptarë nuk ngurojnë të përdorin automjetet e tyre për të lëvizur, qoftë për të shkuar në punë, por edhe për të shijuar fundjavat, e favorizuara edhe nga koha e mirë. Të dhënat zyrtare të doganave për 3-mujorin e parë të vitit tregojnë një rritje të ndjeshme të importit të karburanteve, me afro 9.200 ton më shumë se e njëjta periudhë  e një viti më parë. E thënë ndryshe vetëm në 3 muaj importet regjistrohen në 137.5 mijë ton.

I njëjti fenomen ka ndodhur edhe me importin e birrës, duke qenë se është shtuar numri i hoteleve që ofrojnë shërbim all inclusive e duke qenë se edhe sezoni turistik ka nisur pak më herët këtë vit, vihet re një rritje e importit, me afro 1500 litra, duke fituar gjithnjë e më shumë terren me produktet e prodhuara në vend. Prodhimi vendas u penalizua për shkak të unifikimit të taksës së akcizës, e cila vitin e kaluar u vendos në 710 lekë për sasinë nën dhe mbi 200,000 HL, për prodhuesit vendas dhe të huaj. Në total janë importuar 9638 ton birrë.

Nga ana tjetër rritje me 15 tonë ka shënuar edhe importi i cigareve, ku në tre muaj kanë hyrë në vend dhe kanë shkuar për konsum 865 ton. Pavarësisht rritje së përvitshme të çmimit të paketave, si pasojë edhe e planit të rritjen progresive të akcizës, gjë që ndikon ndjeshëm në të ardhurat e individëve, duket se konsumi i këtij produkti nuk njeh rënie.

Ndërsa, nga 4 mallrat e akcizës, vetëm importi i kafesë rezulton me rënie me 280 ton krahasimisht me Janarin e një viti më parë,  dhe në total kanë hyrë nja jashtë kufijve 1555 ton.

Duke qenë se këtë parashikohet një tjetër pik në sezonin turistik, projektuar në afro 14 milionë turistë, pritet që konsumi i këtyre produkteve të jetë shumë më i lartë dhe rrjedhimisht më shumë të ardhura doganore në buxhetin e shtetit.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.