Sesion i kujdesshëm për bursat europiane – Investitorët po llogarisin efektet e konfliktit në Lindjen e Mesme

Investitorët europianë po tregohen të kujdesshëm në sesionin e parë të kësaj jave dhe po vlerësojnë ndikimin që do të kenë trazirat gjeopolitike në Lindjen e Mesme, pasi grupi militant palestinez, Hamas ndërmorri një sulm në shkallë të gjerë ndaj Izraelit të shtunën në mëngjes. Indeksi pan-Europian Stoxx 600 po qëndron në rënie të lehtë me 0.1%, ndërsa sektori i naftës dhe gazit realizon fitimet më të mëdha me rreth 2.2%. Në anën tjetër, performancën më të dobët e realizon sektori i shitjeve me pakicë, në rënie me 1.5%.

Mbi 1100 persona kanë gjetur vdekjen nga konflikti mes militantëve të Hamasit dhe forcave izraelite. Konflikti izraelito-palestinez u përshkallëzua në një luftë të plotë të shtunën pasi Hamasi organizoi një pushtim, nga i cili Izraeli u kap në befasi.

Për sa i përket korporatave, aksionet e bankës britanike, Metro u rritën me mbi 22% në sesionin e sotëm, pasi banka njoftoi se ka siguruar një rritje të kapitalin prej 325 milionë paund dhe një rifinancim të borxhit prej 600 milionë paund. Sipas marrëveshjes, disa aksionerë të Metro do të kenë një reduktim me 40% të vlerës së aseteve të tyre, ndërsa banka është në bisedime për të shitur deri në 3 miliardë paund pasuri të paluajtshme.

Lidion Kulla / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.