SHBA sanksionon bankën me bazë në Hungari për lidhje me Rusinë!

Tre drejtues të Bankës Ndërkombëtare të Investimeve me bazë në Budapest, të themeluar në Rusi, dy shtetas rusë dhe Imre Laszlóczki, zëvendëspresident i bankës dhe ish-ambasador i Hungarisë në Kazakistan dhe Azerbajxhan, janë vendosur në listën e sanksioneve të SHBA.

Njoftimi u bë nga ambasadori amerikan David Pressman në Budapest këtë të mërkurë. Sipas SHBA-së, Banka Ndërkombëtare e Investimeve është një front për shërbimet e inteligjencës ruse dhe Hungaria u ka dhënë imunitet diplomatik zyrtarëve të saj.

Pronarët europianë të bankës, ndër të tjera, Sllovakia, Rumania dhe Bullgaria janë tërhequr nga projekti, duke e lënë Hungarinë si palën e fundit europiane. Pressman tha se qeveria e Hungarisë kishte injoruar lutjet e administratave të shumta amerikane për të tërhequr aksionet e saj në bankë.

Pressman më herët kishte ngritur shqetësime për intensifikimin e retorikës anti-amerikane midis disa politikanëve kryesorë hungarezë dhe në mediat e lidhura me qeverinë. Ambasadori ka sugjeruar se administrata e djathtë e kryeministrit Viktor Orban, e konsideruar gjerësisht si avokati më i fortë i Putin në BE, po merrte hua nga “propaganda ruse” kur diskutonte për luftën në Ukrainë dhe po ndante unitetin e NATO-s në mbështetjen e saj për Kievin.

Tensioni i fundit në marrëdhëniet Uashington-Hungari rrjedh nga mbështetja financiare e ambasadës së SHBA për një fushatë poster që tërheq paralele midis revolucionit hungarez të ’56 të shtypur nga Bashkimi Sovjetik dhe luftës së Ukrainës kundër agresionit rus.

Qeveria hungareze e përshkroi fushatën si pro luftës, në kundërshtim me qëndrimin hungarez “pro paqes”. Budapesti po kërkon një armëpushim të menjëhershëm dhe bisedime paqeje, duke mohuar se do t’i kërkonte Ukrainës t’i lëshonte territorin agresorit.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.