Shpenzimet, Shqipëri vs Europë – Për ushqim shpenzojmë 41% të të ardhurave, 3 herë më shumë se europianët

Familjet shqiptare mbajnë rekord në Europë sa i përket peshës që zënë ushqimet dhe pijet jo alkolike në shpenzimet e tyre, por janë të fundit për shpenzimet në argëtim dhe kulturë. “Scan Intel” ka kryer një analizë duke krahasuar përbërjen e shpenzimeve familjare në Bashkimin Europian dhe Shqipëri sipas qëllimit të konsumit referuar kryqëzimit të të dhënave të “Institutit të Statistikave” dhe të “Agjencisë Europiane të Statistikave”.

Referuar shifrave të vitit 2021 familjet shqiptare shpenzojnë shumë herë më shumë se ato europiane. Kështu, për vitin 2021 rezulton se familjet shqiptare kanë shpenzuar 34,934 lekë për grupin e konsumit “Ushqim dhe pije jo-alkoolike”.

Ky zë është shpenzimi më i madh i familjeve shqiptare duke zënë edhe 41.3% të peshës përgjatë këtij viti. Nëse do të shihnim të dhënat e për Bashkimin Europian grupi “Ushqim dhe pije jo-alkoolike” zë 14,3% të shpenzimeve gjithsej. Nga ana tjetër, ajo që bie në sy është diferenca mes shpenzimeve për banesën, ujin dhe energjinë në Shqipëri dhe Europë. Pesha që zë ky grup në shpenzimet e familjeve shqiptare është 10%, ndërkohë mesatarja e Bashkimit Europian është 25%.

Po ashtu, diferenca të ndjeshmë ndihet edhe te grupi “Transporti”, ku në Shqipëri zë një peshë prej 6.3%, ndërkohë që në Bashkimin Europian ky tregues është 12.1%. Nga ana tjetër duket se shqiptarët shpenzojnë shumë herë më pak se europianët në argëtim dhe kulturë, madje renditemi në vend të fundit nëse do ta karahasonim me shtetet e tjera. Gati 5.2 pikë përqindje është diferenca mes peshës që zë ky grup në shpenzimet e shqiptarëve mes shpenzimeve të vendeve të europës.

Xhorxhina Deda / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.