Shqipërinë e vizituan rreth 6,3 mln të huaj në 7 muaj – Në rritje edhe numri i shqiptarëve që kalojnë pushimet jashtë vendit

Xhorxhina Deda/SCAN

Shifrat e lëvizjes së shtetasve për muajin Korrik të këtij viti flasin për rreth 1.8 milionë shtetas të huaj që kanë hyrë në territorin shqiptar. Krahasuar me një vit më parë, ky tregues u rrit me 2.7%. Edhe pse norma e rritjes duket se është ngadalësuar në muajin Korrik të këtij viti, sërish vërehet rekord krahasuar me të njejtin muajn të viteve të kaluara. Sipas të dhënave rezultojnë të kenë hyrë në territorin e Republikës së Shqipërisë mbi 2.6 milionë shtetas shqiptarë dhe të huaj dhe ky tregues ka shënaur një rritje me 2.7%, krahasuar me Korrikun e vitit 2023.

Por çfarë thonë të dhënat për periudhën Janar-Korrik të këtij viti? Numri i të huajve regjistruar përgjatë shtatë muajve llogaritet në afërsisht 6.3 milionë, duke shënuar një rritje prej 23.2%. Por sa premtuese është kjo shifër për të realizuar pritjet për rreth 14 milionë të huaj? Nëse i referohemi të dhënave historike është muaji Gusht ai që mban peshën më të lartë sa i përket numrit total të hyrjeve të të huajve përgjatë një viti. Megjithatë, pavarësisht diferencës që mund të bëjnë shifrat e Gushtit kur të bëhen publike nga INSTAT, vihet re një ngadalësim i rritjes së hyrjeve edhe në Qershor, por edhe në Korrik, çka mund të ndikojë në shifrën që pritet deri në fund të vitit 2024.

Nga ana tjetër, në muajin Korrik të vitit 2024, 704,699 shtetas shqiptarë numërohen të kenë dalë nga territori i Shqipërisë, duke shënuar rritje me 1.7%, krahasuar me Korrikun e vitit 2023. Në një periudhë shtatë mujore kanë dalë nga territori rreth 4.4 milionë shtetas shqiptarë. Shifrat tregojnë se numri i shtetasve shqiptarë që po dalin ka qenë gjithmonë në rritje, duke kulmuar sidomos gjatë sezonit turistik. Duket se shqiptarët po zgjedhin gjithmonë e më shumë të pushojnë jashtë, kjo pasi ofertat turistike kanë qenë më të lira ndikuar nga rënia e euros.

Në Korrik të këti vitit, 95% e hyrjeve të shtetasve të huaj në Shqipëri janë nga rajoni i Europës. Europa Jugore zë 71% të hyrjeve të shtetasve të huaj nga kontinenti Europian, ndjekur nga Evropa Qëndrore/Lindore me 10%. Qëllimi i hyrjes në territorin shqiptar i shtetasve të huaj, në 99% të rasteve është për qëllime personale, ku dominojnë hyrjet për Pushime, vizitë tek të afërm, etj.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.