Si do të bëhet transferimi nga Durrësi në Porto Romano. Kreu i Autoritetit Portual, Pirro Vengu zbardh detajet

Kalimi i shërbimeve detare nga Porti i Durrësit në Porto Romano pritet të ndodhë në katër vitet e ardhshme. Drejtori i Autoritetit Portual Të Durrësit, Pirro Vengu, në një intervistë në SCAN Tv me gazetarin Angelo Haruni jep detajet e transferimit të shërbimeve, financimit të projektit të portit të ri në Porto Romano, si edhe zgjidhjen e problemeve të tjera që rrjedhin nga ky transferim.

Sipas Vengut vitin që vjen hapet gara për ndërtimin e Porto Romanos dhe ajo pritet të mbyllet në pak muaj. Më pas, Vengu thotë se afatet e ndërtimit do të jenë 36 muaj. Kështu sipas planeve të deritanishme transferimi pritet të ndodhë në katër vitet në vijim.

Kreu i Autoritetit Portual thotë se edhe financimi për projektin është pothuajse i zgjidhur.

“Në kontratën e ‘Durrës Yacht Marina’, siç dihet shteti është pjesëmarrës me 33%. Sipas projeksionit të të ardhurave, përveç përfitimeve nga taksat që do të ketë shteti, që mund të shkojnë deri në 1 miliard euro, të ardhura të drejtpërdrejta për pjesëmarrjen e shtetit në projekt përllogariten të jenë 280 milion euro. Pra në përllogaritjen e kostos së përgjithshme për ndërtimin e Porto Romanos, që është 390 milion euro, duke u hequr kjo shumë, mbetet të gjenden edhe 100 milion euro. Besoj se gjetja e kësaj shume nuk do të jetë problem”, thotë Vengu.

Sipas tij vendi është në një situatë financiare pozitive dhe që i jep mundësinë qeverisë të ndërmarrë investime të tilla madhore.

Sa i përket implikimeve që mund të sjellin dy arbitrazhet ndërkombëtare me kompanitë që operojnë aktualisht në Portin e Durrësit, Vengu, duke theksuar se kontratat aktualisht janë në zbatim e sipër, shpreson për mundësinë e gjetjes së gjuhës së përbashkët me operatorët në fjalë.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.