Specializimi i mjekëve propozohet për 3 vite – Projektligji, në Konsultime Publike. Cilat janë ndryshimet e parashikuara?

Ministria e Arsimit ka parashikuar disa ndryshime në ligjin “Për trajtimin e veçantë të studentëve që ndjekin programin e integruar të studimit të ciklit të dytë “Mjekësi e Përgjithshme”, në institucionet publike të arsimit të lartë”.

Tashmë projektligji i publikuar në Konsultimet Publike, ndryshimet i ka në disa pika të neneve të ligjit aktual. Për ta konkretizuar, është propozuar që pas përfundimit të studimeve do të kenë mundësinë të punojnë 3 vjet dhe jo 5 siç është në ligjin aktual në institucionet shëndetësore në Shqipëri.

Dhe deri në shlyerjen e detyrimeve për punësim ose e thënë ndryshe për periudhën e specializimit, sipas afatit të propozuar 3-vjeçar do të kenë të drejtën për tërheqjen e diplomës universitare.

Sipas projektligjit koha e kryerjes së procedurës për punësimin e mjekut nga ministria përgjegjëse për shëndetësinë, është brenda 3 muajve nga momenti i lindjes së të drejtës për punësim.

Por çfarë është parashikuar nëse punësimi nuk realizohet brenda 3 muajve?

Sipas projektligjit, për shkaqe të cilat nuk varen nga mjeku, deri në krijimin e mundësisë për punësimin në institucionet shëndetësore publike, për një për periudhë deri në 9 muaj, mjekut i lind e drejta të trajtohet me 80% të pagës së mjekut të përgjithshëm në kujdesin parësor, për një periudhë jo më të gjatë se ky afat, ose të zgjedhë të punësohet në institucionet shëndetësore jo publike në vend, duke njoftuar ministrinë përgjegjëse për shëndetësinë, si dhe duke ruajtur të drejtën për punësim prioritar brenda periudhës 9-mujore në institucionet shëndetësore publike.

Në tetor të vitit të kaluar studentët e mjekësisë ankimuan në Gjykatën Kushtetuese ligjin. Ndërsa, në  muajin shkurt Kushtetuesja shfuqizoi pjesërisht ligjin duke lënë në fuqi detyrimin e punës prej 3,5 vitesh pas diplomimit.

Diamila Leka/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.