Strategji Kombëtare për Inteligjencën Artificiale – Ngrihet edhe Qendra Qeveritare e Sigurisë Kibernetike, Gov-Soc

Shqipëria pritet të hartojë për herë të parë brenda këtij viti një strategji kombëtare për inteligjencën artificiale. Në Fletoren Zyrtare është publikuar Dokumenti i Politikave Prioritare 2025-2027, ku përcaktohen hapat që do të ndërmerren.

Ky sektor do të zhvillohet duke pasur parasysh një akses më të lehtë dhe më të lartë në teknologjitë digjitale si në aspektin gjeografik ashtu dhe në atë financiar, aftësitë digjitale të të gjithë grupmoshave përfshirë personat e moshës së tretë që ndeshen me më tepër vështirësi, mbrojtjen e të dhënave personale në përputhje me standardet e Bashkimit Evropian dhe bashkëpunimin me partnerët tanë strategjikë për forcimin e sigurisë kibernetike.

Me qëllim përmirësimin e sigurisë kibernetike dhe mbrojtes së të dhënave pas sulmeve të vazhdueshme që kanë shoqëruar portalet qeveritare, por jo vetëm, është parashikuar ngritja e një Qendre Qeveritare të Sigurisë Kibernetike të quajtur ndryshe Gov-Soc. Kjo qendër do të kryejë monitorimin dhe reagimin e aktiviteteve në rrjetin qeveritar duke u bazuar në metodat e përdorura nga Microsoft.

Vendi ynë tashmë është bërë pjesë e programit të Bashkimit Evropian “Evropa Digjitale”, me qëllim transformimin e plotë digjital dhe po synon përdorimin e inteligjencës artificiale në shumë fusha, përfshirë edhe përshpejtimin e përafrimit të legjislacionit shqiptar me acquis të BE-së.

Ky lajm vjen në një kohë kur inteligjenca artificiale ka pushtuar teknologjinë dhe çdo shtet po miraton një kuadër ligjor që rregullon veprimtarinë e përdorimit të inteligjencës artificiale, krahas investimeve që po bëhen në këtë fushë. Pavarësisht kësaj, shoqëria shqiptare gjendet akoma shumë larg të ashtuquajturës shoqëri Gigabit duke marrë në konsideratë hendekun e gjerë digjital ndërmjet zonave rurale dhe urbane. Prandaj, infrasturuktura digjitale ne Shqipëri ka ende nevojë për shumë përmirësim.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.