“Të krijohet enti rregullator i karburanteve” – Konfindustria: Operatorët të jenë pa të drejtë vote në bord!
Krijimi i entit rregullator të karburanteve si institucion profesional, i përhershëm dhe në varësi të Kuvendit të Shqipërisë është kërkesa që konfidustria i ka drejtuar këtë të hënë qeverisë. Duke i cilësuar si më të lartat në rajon Konfidustria thotë se rritja e çmimeve të karburanteve ditët e fundit thellon edhe më shumë diferencën me vendet e Rajonit, me pasoja shkatërruese për ekonominë kombëtare, biznesin dhe qytetarët.
Konfindustria kërkon që qeveria të ndryshojë përbërjen e Bordit të Transparencës, duke përjashtuar përfaqësuesit e operatorëve të karburanteve si anëtarë me të drejtë vote në vendimmarrje. Pasi sipas tyre është e papranueshme që vendimmarrjet të përcaktohen edhe nga subjektet, që duhet të jenë objekt vëzhgimi për spekulime të mundshme në treg dhe për të cilët përligjet qëllimi i krijimit të vetë Bordit të Transparencës.
Një mburojë shtetërore ndaj spekulimeve antitreg të operatorëve e përkufizon konfindustria bordin e transparencës duke thënë se përbërja e deritashme, burimet e njëanshme të të dhënave dhe mungesa e anëtarëve të pavarur dhe profesionistë, krijojnë hapësira të mëdha për interpretim të pasaktë, dhe korrupsion në vendimmarrje.
Sipas Konfindustrias qeveria duhet të ndërhyj menjëherë për lehtësimin e ngarkesës fiskale me qëllim uljen e çmimit të karburanteve. Aktualisht, nafta ka arritur në 261 lekë/litër, benzina në 236 lekë/litër dhe gazi në 86 lekë/litër.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.