Tensionet në Lindjen e Mesme rrisin naftën me 2% – SHBA dhe Britania, sulme ushtarake ndaj Houthit në Jemen

Çmimet e naftës janë rritur ndjeshëm, me mbi 2%, në sesionin e fundit të javës, për shkak të rritjes së tensioneve në Lindjen e Mesme. Shtetet e Bashkuara dhe Britania ndërmorrën disa sulme ushtarake kundër objektivave në zonat e kontrolluara nga Houthi në Jemen, për shkak të sulmeve ndaj anijeve tregtare në Detin e Kuq.

Nafta është rritur ndjeshëm në sesionin e sotëm, pasi Shtetet e Bashkuara dhe Britania ndërmorrën disa sulme ushtarake kundër objektivave në zonat e kontrolluara nga Houthi në Jemen, ndërsa tensionet në Detin e Kuq rriten më tej. Nafta Brent e Londrës është rritur me mbi 2% në sesionin e sotëm dhe po tregtohet në rreth 79 dollarë për fuçi, ndërsa nafta Bruto amerikane po tregtohet në rreth 74 dollarë për fuçi, në rritje me 2.4%.

“Këto sulme janë një mesazh i qartë se Shtetet e Bashkuara dhe partnerët nuk do të tolerojnë sulme ndaj personelit tonë dhe nuk do të lejojnë aktorët armiqësorë të rrezikojnë lirinë e lundrimit në një nga rrugët tregtare më kritike në botë”, tha Presidenti amerikan, Joe Biden, në një deklaratë të enjten në mbrëmje. Grupi Houthi ka sulmuar anijet tregtare në Detin e Kuq, duke përfshirë ato nga SHBA-ja dhe Izraeli, si hakmarrje për luftën në Gaza që deri më tani ka vrarë rreth 23,000 njerëz në enklavën palestineze.

Kompanitë e mëdha të transportit detar ndaluan kalimin e rrugëve të Kanalit të Suezit dhe Detit të Kuq në fillim të dhjetorit, duke zgjedhur rrugën përmes Afrikës Jugore. Kjo rezultoi në udhëtime më të gjata dhe më të shtrenjta, të cilat rritën tarifat e transportit të mallrave në oqean. Në një fjalim televiziv të enjten, udhëheqësi i Huthit në Jemen, Abdul-Malik al-Houthi, u zotua se çdo sulm amerikan ndaj grupit nuk do të kalojë pa kundërpërgjigje. Në njoftimin e sulmeve të enjten, presidenti Biden u zotua se nuk do të hezitojë të mdërmarrë masa të mëtejshme për të mbrojtur popullin dhe rrjedhën e lirë të tregtisë ndërkombëtare.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.