Transparenca në industrinë nxjerrëse – Miratohet granti 700 mijë USD për EITI Shqipëri, përmirësim aksesit në të dhëna

Banka Ndërkombëtare për Rindërtim dhe Zhvillim ka akorduar një grant prej 700 mijë dollarë për Nismën për Transparencë në Industrinë Nxjerrëse në Shqipëri, që ndryshe njihet si EITI.

Qeveria ka miratuar letërmarrëveshjen me bankën për financimin e projektit, i cili përbëhet nga disa komponentë. Pjesa e parë përfshin mbështetjen e raportimit pranë EITI-t ndërkombëtar, që është një detyrim për Shqipërinë si pjesë e kësaj nisme.

Pjesa e dytë parashikon mbështetjen për përmirësimin e aksesit tek të dhënat e EITI-t, duke përfshirë, ndër të tjera: Kryerjen e vlerësimeve të ndikimeve të pajtueshmërisë me legjislacionin ekzistues mbi regjistrin tregtar të pronarëve përfitues, kushtet sociale-ekonomike të industrisë së prodhimit të naftës dhe rreziqet dhe përfitimet e lidhura dhe investimet e huaja për sektorin ekstraktues.

Po ashtu, synohet kryerja e disa studimeve mbi raportimin gjinor dhe pjesëmarrjen e grave në sektorin ekstraktues, përfshirjen e sektorit të energjisë së rinovueshme (erë dhe diellore) dhe gazit në raportimin e EITI-t, duke përfshirë mbështetjen për dialogun mbi tranzicionin e energjisë apo kryerjen e analizave të legjislacionit aktual mbi shëndetin dhe sigurinë në punë në sektorin ekstraktues.

Pjesa tretë përfshin mbështetjen dhe ndërtimin e kapaciteteve, ndërsa pjesa e katërt, menaxhimin e projektit, duke përfshirë monitorimin, vlerësimin, koordinimin dhe mbikëqyrjen dhe auditimin e tij.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.