Tregjet europiane sërish në rënie – Humbjet më të mëdha i realizon sektori i shitjeve me pakicë

Tregjet europiane të aksioneve po qëndrojnë në rënie në sesionin e sotëm, me sektorin bankar që vijon të jetë në territor negativ, pavarësisht një rimëkëmbje të lehtë gjatë sesionit aziatik.

Indeksi pan-Europian Stoxx 600 e ka nisur ditën në rënie me rreth 0.4%, ndërsa shumica e sektorëve janë në ngjyrë të kuqe. Sektori i shitjeve me pakicë kryeson humbjet, në rënie me rreth 1.9% dhe më pas vjen sektori i naftës dhe gazit, në rënie me rreth 1.4%. Sektori bankar realizon humbje modeste prej rreth 0.5%.

Investitorët po presin edhe prezantimin e buxhetit të pranverës në Mbretërinë e Bashuar, në një kohë që vendi po përballet me një rritje të kostos së jetesës. Ndërkohë, Presidenti amerikan, Joe Biden u përpoq të sigurojë amerikanët se sistemi bankar është i fortë, pavarësisht kolapsit të Silicon Valley Bank. Biden këmbënguli se masat e marra nuk do të paguhen nga paratë e taksapaguesve amerikanë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.