Tregu i metaleve, në pritje të inflacionit – “IÇK” pritet të jetë ngadalësuar në 3.3% në tetor, nga 3.7% në shtator

Metalet e çmuara po tregtohen në qëndrueshmëri në sesionin e sotëm, pasi investitorët po presin të dhënat mbi inflacionin në SHBA, që do të publikohen më vonë gjatë ditës së sotme dhe do të japin një panoramë më të qartë mbi normat e interesit në ekonominë më të madhe në botë. Kontrata “spot” për arin po tregtohet në rreth 1947 dollarë për onz, niveli më i ulët në 3 javët e fundit.

Ndërsa kontrata “futures” po qëndron në reth 1950 dollarë për onz. Analistët shprehen ecuria e metalit të çmuar do të varet nga të dhënat mbi inflacionin në SHBA. Nëse çmimet do të jenë ngadalësuar më shumë se parashikimet e analistëve, metali i verdhë mund të rritet drejt nivelit të 1,968 dollarëve.

Ekonomistët e anketuar nga Reuters presin që Indeksi i Çmimeve Konsumatore në SHBA të jetë ngadalësuar në 3.3% në tetor nga 3.7% në shtator, ndërsa e ashtuquajtura norma e inflacionit bazë, që përjashton komponentët e paqëndrueshëm si energjia dhe ushqimet, të mbetet e pandryshuar në 4.1%. Kryetari i Rezervës Federale, Jerome Powell, deklaroi javën e kaluar se banka nuk është e sigurt nëse normat e interesit janë mjaftueshëm të larta për të zbutur inflacionin.

Tregu po vlerëson 86% mundësi që banka qendrore e SHBA të lërë normat e pandryshuara në dhjetor. Pavarësisht se cilësohet si një mburojë ndaj inflacionit, normat më të larta të interesit rrisin koston oportune për mbajtjen arit. Ndër metalet e tjera, argjendi po tregtohet në rreth 22.4 dollarë për onz, ndërsa platini po tregtohet në rreth 870 dollarë për onz.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.