Trenat, “favore” për udhëtarët – Nga kompensimi në rast vonesash, apo anulimesh, te bagazhet dhe rritja e aksesit

Teksa disa projekte hekurudhore avancuan gjatë vitit 2023, Ministria e Infrastrukturës dhe Energjisë ka hartuar udhëzimin që synon inkurajimin e udhëtarëve për të përdorur këtë lloj transporti, si dhe mbrojtjen e tyre.

Udhëzimi paraqet kërkesa konkrete në drejtim të informimit të udhëtarve në lidhje me oraret apo çmimin e biletave, por edhe përgjegjësitë që i lindin kompanisë që operon hekurudhën në rast të dëmtimit të bagazheve, kompensimit në rast të vonesave apo anulimit të udhëtimit, si dhe në rast të aksidenteve hekurudhore.

Kështu, në rast të një udhëtimi të humbur ose anulimi, sipërmarrja hekurudhore përgjegjëse, i ofron udhëtarit zgjedhjen midis disa opsionesh, që mund të jetë një biletë tjetër falas për një datë dhe orar të njëjtë të udhëtimit të vonuar ose të anuluar; kthim të vlerës së biletës së blerë; një biletë tjetër për një datë dhe orar të ndryshëm apo transportin falas në vendin e caktuar të destinacionit.

Po ashtu, duhet të ofrohet kujdes dhe ndihmë për akomodim dhe ushqim, nëse kjo është e nevojshme për shkak të vonesës së shërbimit të hekurudhës. Udhëzimi parashikon gjithashtu dhënien e ndihmës dhe aksesueshëmri për persoant me aftësi të kufizuara nga Ofruesit e shërbimeve të transportit të ridrejtimit u ofrojnë personave me aftësi të kufizuara.

Aktualisht, transporti hekurudhor është pak i përdorur nga qytetarët, ndërkohë që projekti më i afërt që parashikohet të përfundojë është hekurudha Tiranë – Durrës dhe degëzimi i ri drejt Rinasit.

Ola Mitre/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.