TSMC e Tajvanit ndërton një fabrikë të re çipash në SHBA – Më shumë se 11 miliard dollarë grante dhe kredi për investimin

TSMC e Tajvanit po ndërton një fabrikë të re çipash në Shtetet e Bashkuara të Amerikës. Ky projekt do të përfitojë më shumë se 11 miliardë dollarë grante dhe kredi për investimin. Qeveria amerikane synon të arrijë në 20% të prodhimit global të gjysmëpërçuesve brenda 10 viteve të ardhshme.

TSMC do të prodhojë çipa të teknologjisë së avancuar në një fabrikë në Phoenix, Arizona, objekti i dytë i kompanisë në Shtetet e Bashkuara të Amerikës. Objektet në SHBA do të ndërtohen nga ‘Taiwan Semiconductor Manufacturing’, prodhuesi më i madh i çipave në botë, në këmbim të miliarda subvencioneve nga qeveria amerikane, e cila synon të prekë 20% të prodhimit global të gjysmëpërçuesve brenda 10 vitesh..

Kompania gjigande ka rënë dakord të prodhojë produktet më të avancuara në Arizona duke filluar nga viti 2028, duke forcuar përpjekjet e Shtëpisë së Bardhë për të sjellë prodhimin e vështirë dhe të shtrenjtë të çipave në tokën amerikane.

TSMC do të prodhojë çipa 2 nanometërsh në një fabrikë në Phoenix, Arizona. Ajo njoftoi gjithashtu se do të rrisë investimin e saj total në SHBA nga 40 miliardë dollarë në 65 miliardë dollarë për të ndërtuar një fabrikë të tretë, për çipa 2 nanometërsh ose teknologji edhe më të avancuar, e cila do të jetë funksionale deri në vitin 2030.

Kompania me bazë në Tajvan shtoi se Uashingtoni do t’i ofronte mbështetje prej 6.6 miliardë dollarë grante dhe 5 miliardë dollarë kredi, subvencione që sigurohen nga Akti i Gjysmëpërçuesve, i cili u miratua në vitin 2022 për të nxitur prodhimin vendas.

Muajin e kaluar, administrata Biden zbuloi një marrëveshje për 8.5 miliardë dollarë grante dhe 11 miliardë dollarë kredi për Intel të Silicon Valley, e cila ka premtuar 100 miliardë dollarë investime të reja.

Rritja e frikës për një pushtim kinez të Tajvanit, ku aktualisht prodhohen 90% të çipave të teknologjisë së fundit, kanë shtyrë SHBA-në të shtojë përpjekjet për të rritur prodhimin vendas të gjysmëpërçuesve.

Zyrtarët amerikanë e shohin investimin si jetik për ndërtimin e një furnizimi të besueshëm vendas me gjysmëpërçues – mikroçipet që fuqizojnë gjithçka, nga telefonat dhe superkompjuterët deri te makinat dhe avionët luftarakë.

Megjithëse gjysmëpërçuesit u shpikën në SHBA, prodhimi është zhvendosur në dekadat e fundit kryesisht jashtë shtetit. Uashingtoni ka theksuar në mënyrë të përsëritur nevojën për të rritur prodhimin vendas të çipave për të kufizuar ndërprerjet e mundshme të furnizimit. Tajvani është gjithashtu në një pozitë të cenueshme.

Ekspertët e zinxhirit të furnizimit dhe zyrtarët amerikanë shqetësohen se tensionet tregtare SHBA-Kinë dhe një sulm i mundshëm ushtarak në ishull nga Pekini mund të prishin industrinë jetike të prodhimit të çipave. Një tërmet i fuqishëm në Tajvan javën e kaluar gjithashtu theksoi ekspozimin e industrisë ndaj fatkeqësive natyrore.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.