Udhëtimet për pushime shënojnë rekord në Europë – Pavarësisht paralajmërimeve për sigurinë, njerëzit zgjedhin të largohen
Udhëtimet brenda Europës në sezonin e festave po i tejkalojnë nivelet e vitit 2022, pavarësisht paralajmërimeve të sigurisë nga autoritetet në mbarë Europën pasi konsumatorët mbeten të vendosur për të shijuar pushimet, duke zgjatur boom-in e udhëtimeve pas pandemisë.
Tregjet e Krishtlindjeve dhe vendet e njohura turistike në qytete si Mynihu dhe Parisi kanë qenë plot zhurmë kohët e fundit, megjithëse me prani të forta sigurie, pasi udhëtimet për pushime brenda Bashkimit Europian dhe duke përfshirë Britaninë ishin vendosur të rriteshin 22% mbi nivelet e vitit 2022, sipas firmës së të dhënave të udhëtimit ForwardKeys.
Rritja është nxitur nga kërkesa e vazhdueshme pas pandemisë, sipas drejtuesve dhe analistëve, me disa njerëz që udhëtuan vetëm për të parë familjet e tyre për Krishtlindje këtë vit për herë të parë që nga pandemia. Por paralajmërimet e sigurisë mbeten në qendër të vëmendjes së turistëve. Në fund të nëntorit, zyrtarët europianë të sigurisë paralajmëruan për një rrezik në rritje të sulmeve të lidhura me luftën Izrael-Hamas.
Dy sulme të militantëve islamikë në Francë dhe Belgjikë në tetor vranë tre persona dhe këto dy vende por edhe Austria, Sllovenia dhe Bosnje-Hercegovina kanë ngritur nivelin e alarmit të kërcënimit nga terrorizmi. Italia ka rivendosur kontrollet kufitare me Slloveninë.
Pati një rritje të lehtë në anulimet e biletave gjatë periudhës së Krishtlindjes midis 21 dhe 31 dhjetorit, tha ForwardKeys, nga 2.4% në 3% që nga 24 nëntori. Por turistët vazhduan të udhëtojnë në destinacione të njohura, duke shfaqur një besim të shtuar në aparatin e sigurisë në vend nëpër qendrat europiane.
Mbërritjet për Krishtlindje në vende të tilla si Italia, Austria dhe Suedia janë rritur gjithashtu me 25% ose më shumë nga viti në vit. Turistët thanë se, me rritjen e paralajmërimeve në vitet e fundit dhe sigurinë e përforcuar në të gjithë Europën, kishte më shumë një ndjenjë qetësie dhe ata ndiheshin më mirë që të mos anulonin planet e tyre të udhëtimit.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.