Unifikohet niveli i pagave në të gjitha bashkitë – Mazniku: Administrata vendore, konkurruese në treg për të tërhequr profesionistët
Diamila Leka/ Scan
Në mbledhjen e qeverisë këtë të enjte, u miratua rritja e pagave për punonjësit e pushtetit vendor. Pas mbledhjes së Këshillit të Ministrave, ministri për Pushtetin Vendor, Arbjan Mazniku u shpreh se pagat e pushtetit vendor do të unifikohen në të gjitha bashkitë.
“Riklasifikuam nivelet e pagave, duke ndryshuar skemën. Nga një skemë e cila i ndante bashkitë në 5 grupime dhe në varësi të madhësisë së bashkive kishte edhe nivele të ndryshme pagash, në nivele pagash të unifikuar të të gjitha bashkive, pavarësisht madhësisë, duke dhënë mundësinë që një jurist, një arkitekt, ekonomistë etj merr një pagë të ngjashme në të gjitha bashkitë. Elementi tjetër është rritja e pagave të të gjitha bashkive dhe rritja e minimume dhe maksimumeve të reja për të gjitha bashkitë në nivele të unifikuara të pagave”.
Më tej ministri Mazniku njoftoi se është ngritur një grup pune që ka në fokus rishikimin e formulës së grantit që qeveria u ndan bashkive. Sipas tij, në vitin e ardhshëm ndarja do të bëhet me një formulë të re.
“Kemi ngritur grup pune që po merret me rishikimin e formulës për shpërndarjen e garantit. Në buxhetin e 2025 do ketë formulë të re dhe një nga elementët do jetë edhe treguesi i performancës.”
Sipas ministrit asnjë bashki nuk do të marrë më pak para se viti që shkoi përmes formulës së re që do të aplikohet për ndarjen e grantit.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.