UNIPER në bisedime me qeverinë gjermane – Përpjekje për të shpëtuar kompaninë pas krizës së mungesës së gazit
Kompania energjitike Uniper në Gjermani është në negociata për një shpëtim të mundshëm nga ana e qeverisë, për shkak të pasojave financiare prej pakësimit të furnizimeve me gaz rus që ndihen në të gjithë Europën, duke ulur vlerën e aksioneve të shoqërisë energjitike.
Reduktimi i furnizimit me gaz ka detyruar kompanitë në të gjithë kontinentin që të bëjnë blerje të shtrenjta në treg për të plotësuar mungesën e ofertës, në një kohë që qeveritë të shqetësuara për rritjen e inflacionit, kanë vendosur një kufi të çmimit për konsumatorët, duke peshuar në financat e furnizuesve.
Një zëdhënës i ministrisë gjermane të ekonomisë u shpreh se qeveria është në bisedime me Uniper, një nga klientët më të mëdhenj europian të ruses Gazprom, për aktivizimin e masave të stabilizimit.
Administratori i deleguar i Uniper pohoi se është biseduar për garanci të mundshme, rritjen e linjave të kredisë por dhe për një ndërhyrje të drejtpërdrejtë përmes një pjesëmarrjeje aksionere nga ana e shtetit. Deri tani nuk është bërë e ditur shuma e saktë që kompania kërkon në formën e mbështetjes financiare.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.