Vendi që i gëzohet inflacionit – Japonia kërkon shpëtimin nga deflacioni

Ekonomitë perëndimore mund të jenë në vuajtje se si të zbusin inflacionin, por një nga vendet më të zhvilluara në planet është i lumtur që e ka atë.

Për Japoninë, ekonominë e tretë më të madhe në botë në vështirësi, lajmi se inflacioni u rrit në nivelin më të lartë tre mujor prej 3.3% në tetor, ishte ‘muzikë’ për veshët e politikëbërësve. Pas gati tre dekadash deflacioni dhe shumë sprovash, kriza e shkaktuar nga pandemia dhe e përkeqësuar nga lufta në Ukrainë duket se mund të ketë qenë shtytja e mprehtë që i duhej ekonomisë japoneze për t’u çlodhur.

Çmimet e konsumit, duke përjashtuar ushqimet e freskëta dhe energjinë, u rritën 3.8% nga viti në vit, ritmi më i shpejtë që nga viti 1981. Indeksi bazë i çmimeve të konsumit, i cili përjashton koston e paqëndrueshme të ushqimeve të freskëta, u rrit me 2.7% në tetor. Megjithëse rritja erdhi me një ritëm më të ngadaltë se sa pritej, ajo mbeti mbi objektivin prej 2% për të 19-in muaj radhazi. Tendenca vazhdoi në nëntor, ndonëse me ritëm më të ngadaltë, në 2.3% nga viti në vit.

Presioni inflacionist – i cili filloi me çmimet më të larta të importit për shkak të rrëshqitjes së jenit ndaj dollarit dhe euros – tani është përhapur në pothuajse 90% të artikujve në “shportën” e indeksit të çmimeve të konsumit. Në familjet e vendit, lajmi nuk është përjetuar me të njëjtin entuziazëm. Aq më tepër kur kjo ende nuk është kompensuar me rritjen e duhur të pagave. Por duke pasur parasysh situatën e veçantë në të cilën ndodhet ekonomia e Japonisë, zhvillimi karakterizohet si inkurajues për perspektivën e saj.

Të dhënat e nëntorit, tregojnë se inflacioni ra në 2.6% nga viti në vit. Bazuar në parashikimet e fundit të FMN-së, Gjermania pritet të zëvendësojë Japoninë si ekonomia e tretë më e madhe në botë këtë vit. Duke qenë se tendencat inflacioniste tregojnë disa shenja stabilizimi, Banka qendrore po shqyrton ndryshimin e politikës së saj monetare. Analistët vlerësojnë se mund të braktisë normat negative të interesit brenda këtij viti. Megjithatë, shqetësimet mbeten nëse rritja e çmimit është e qëndrueshme apo e përkohshme, për shkak të kostove më të larta të mallrave dhe një jeni më të dobët. Por vendi ka regjistruar dhe një rritje të mëtejshme të pagave në pritje për të nxitur kërkesën e brendshme. PBB-ja u tkurr në tremujorin e tretë të këtij viti me 2.9%, duke shënuar rënien më të madhe që nga pranvera 2020.

Pothuajse në stanjacion ndërkohë për një çerek shekulli, pagat kanë filluar të rriten. Ato u rritën mesatarisht me 3.58% në sektorin privat pranverën e kaluar, ritmi më i shpejtë në dekada. Megjithatë, ato mbeten më të ulëta se ato të inflacionit. Ndërkohë kryeministri Fumio Kishida njoftoi një paketë të re të mbështetjes ekonomike prej më shumë se 17 trilion jen në fillim të këtij muaji: 100 miliardë euro. Ai zgjati deri në prill vlefshmërinë e subvencioneve – tashmë të përgjysmuara – për çmimet e energjisë si dhe një ulje të njëhershme të tatimit mbi të ardhurat familjare për vitin 2024.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.