Volum i ulët për bursat europiane – Wall Street qëndron i mbyllur, me rastin e Ditës së Falenderimeve
Bursat europiane po qëndrojnë në rritje të lehtë në sesionin e sotëm, ndërsa volumi i shkëmbimeve tregtare është i ulët, për shkak se Wall Street do të qëndrojë pushim me rastin e Ditës së Falenderimeve.
Indeksi pan-Europian Stoxx 600 po qëndron në rritje të lehtë me 0.1%, ndërsa sektori i naftës dhe gazit realizon fitimet më të mëdha, pas humbjeve drastike të një dite më parë. Ndërkohë, të dhënat paraprake të indeksit menaxherial të blerjeve në Eurozonë për nëntorin, treguan se punësimi ra për herë të parë në gati tre vjet.
Edhe aktiviteti i biznesit vazhdoi rënien, megjithëse ritmi i tkurrjes u ngadalësua në prodhim dhe në bizneset e reja. Investitorët po ndjekin me interes edhe rezultatin e zgjedhjeve në Holandë, pasi populisti i ekstremit të djathtë Geert Wilders është në rrugën e duhur për një fitore dramatike me Partinë e tij të Lirisë.
Edhe indekset kryesore në Wall Street u rritën në sesionin e kaluar, pasi yield-i i obligacioneve 10-vjeçare amerikane ra në nivelin më të ulët në 2 muaj. Ndërkohë, në fokus të tregjeve kanë qenë edhe planet e reja të qeverisë në Mbretërinë e Bashkuar, për uljen e taksave për individët dhe bizneset.
Por, Zyra për Përgjegjësinë Buxhetore, e cila është e pavarur uli ndjeshëm parashikimet për rritjen ekonomike në Mbretërinë e Bashkuar dhe rriti parashikimet për inflacionin.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.