108 milionë euro borxhe ndaj bizneseve e qytetarëve – Në një vit, ulet stoku i detyrimeve të prapambetura me vetëm 8.8 mln euro

Qeveria qendrore dhe ajo vendore kanë një stok borxhi ndaj qytetarëve dhe bizneseve në vlerën e rreth 12.2 miliardë lekëve apo 108 milionë eurove.  Ky është stoku i detyrimeve të prapambetura që rezulton në mbyllje të vitit 2022 dhe që ka pasur luhatje të vazhdueshme gjatë vitit.  Nëse do të bëjmë krahasimin me bazë vjetore, përgjatë 1 viti, detyrimet e prapambetura janë ulur vetëm me 1 miliardë lekë apo 8.8 milionë euro, shifër kjo e pandjeshme ndaj totalit të këtij borxhi.

Peshën më të madhe të stokut e mban qeveria qendrore me rreth 6.2 miliardë lekë. ndërsa qeveria vendore ka akumuluar një vlerë prej 5.9 miliardë lekësh. Së fundmi ndaj pushtetit vendor është ndërmarrë një iniciativë ligjore e cila i detyron bashkitë që fondet e trashëguara nga një vit më parë t’i përdorin për të shlyer detyrimet e prapambetura.  Borxhet më të mëdha i takojnë zërit të investime, ku bëhet fjalë për projekte të punëve publike për të cilat ende nuk janë bërë pagesat ndaj kompanive dhe që detyrimet arrijnë në vlerën e 4.78 miliardë lekë.

Në vendin e dytë për nga pesha që zënë në stokun total të detyrimeve të prapambetura renditen vendimet gjyqësore, të cilat regjistrohen në 3.76 miliardë lekë dhe kanë të bëjnë kryesisht me largime të padrejta nga puna në administratën publike apo çështje të hapura kundrejt shtetit shqiptar. Në shifra të ulëta renditen zëra të tjerë, si shërbime, mirëmbajtje, sigurime shoqërore, sigurime shëndetësore, etj.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.