174,3 mln euro remitanca në 2 muaj – Dërgesat e emigrantëve në Kosovë, në rritje kundrejt vitit të kaluar

Ndonëse me një rënie të lehtë nga fundi i vitit të kaluar, remitancat në Kosovë kanë regjistruar vlera të larta në dy muajt e parë të 2024-ës. Të dhënat e Bankës Qendrore të Kosovës tregojnë se dërgesat e emigrantëve në janar arritën vlerën 86.4 milionë euro. Ndërsa, sipas vlerësimeve paraprake për muajin shkurt ishin rreth 87.9 milionë euro, duke arritur kështu vlerën totale prej 174.3 milionë euro.

Prurjet më të mëdha edhe gjatë muajit shkurt kanë qenë përmes institucioneve financiare jobanka me 64.4%, bankave 15.9%, ndërsa nëpërmjet kanaleve të tjera 19.7%.

Në bazë vjetore vërehet një rritje e dërgesave të emigrantëve gjatë dy muajve të parë të vitit. Në periudhën janar-shkurt 2023 u regjistruan 166,1 milionë euro remitanca, ose rreth 8,2 milionë euro më pak se e njëjta periudhë e vitit 2024.

Dërgesat e emigrantëve në Kosovë për vitin 2023 regjistruan rekordin e gjashtë viteve të fundit duke arritur në rreth 1,344 miliardë euro, ose 10% më shumë se viti paraardhës.

Referuar të gjithë vitit 2023, gushti ishte muaji me vlerën rekord të remitancave prej 141,7 milionë euro, çka lidhet edhe me rikthimin në atdhe të emigrantëve për pushimet verore. Ndërkohë, e njëjta gjë mund të thuhet edhe për dhjetorin, muaji me vlerën e dytë më të lartë vjetore.

Remitancat në Kosovë vijojnë të vijnë kryesisht nga Gjermania dhe Zvicra, që përbëjnë rreth 55% të totalit, ndjekur nga SHBA dhe vendet e tjera të Eurozonës.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.