2 operatorë në treg, thuajse 4 milionë karta SIM në qarkullim – Konsumi mesatar i thirrjeve, rënie 7.6%. Ndërsa i internetit rritje me 8.6%.

Ndërsa në vitin 2023 tregu i telefonisë celulare pësoi një ndryshim rrënjësor duke numëruar jo më tre operatorë, por dy, një ecuri të pazakontë ka shënuar numri i kartave në qarkullim. AKEP raporton se numri i pajtimtarëve të shërbimeve celulare sipas kartave SIM në fund të T3 2023 ishte rreth 3,936,490 që përbën një rritje me 3.4% në krahasim me tremujorin e mëparshëm, dhe një rritje me 6.3% në krahasim me T3 2022.

Rritje ka shënuar edhe numri i kartave aktive. Autoriteti i Komunikimeve elektronike bën gjithashtu me dije se numri i përdoruesve aktivë të telefonisë celulare gjatë T3 2023 arriti në rreth 3 milionë që përbën një rritje me rreth 9.6% me T2 2023 dhe rritje me rreth 4.6% me T3 2022.

Ndërkohë që kjo rritje e kartave në qarkullim nuk është shoqëruar me rritje të thirrjeve e sms-ve. Totali thirrjeve dalëse të gjeneruara nga pajtimtarët celularë në Shqipëri në T3 2023 ishte rreth 1.1 miliardë minuta, me një rritje prej 1.2% në krahasim me tremujorin paraardhës dhe me një rënie prej 12.5% me T3 2022.

Sasia e thirrjeve drejt rrjeteve të tjera celulare kombëtare (off-net) pësoi rritje me 2.3% në krahasim me T2 2023 dhe rënie me 21.6% në krahasim me një vit më parë në T3 2022. Sasia e thirrjeve on-net pësoi rritje me 0.3% në krahasim me T2 2023 dhe pësoi një rënie me 5.9% në krahasim me T3 2022. Proporcioni i thirrjeve on-net/off-net në T3 2023 ishte 60%/38%, kundrejt 56%/42% në T3 2022.

Konsumi mesatar mujor për përdorues aktiv i shërbimeve celulare gjatë T3 2023 ishte: 124 minuta dalëse, 10 SMS dhe 7.94 GB Internet. Krahasuar me T2 2023, konsumi mesatar i thirrjeve pati një rënie me 7.6%, konsumi mesatar i SMS-ve pati një rënie me 20.4% dhe konsumi mesatar i internetit pësoi rritje me 8.6%. Këta tregues flasin qartë që abonentët e kompanive celulare parapëlqejnë të përdorin platformat e komunkimit që ofrojnë kryesisht rrjetet sociale në vend të sms-ve apo telefonatave celulare.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.