2023, për herë të parë mbi 1.4 milionë karta bankare – Megjithatë, dominohen nga kartat e debitit, që përdoren për tërheqjen e rrogës
Për herë të parë, numri i kartave bankare në vend ka kaluar shifrën 1.4 milionë. Sipas të dhënave të Bankës së Shqipërisë, në fund të tremujorit të tretë të vitit, rezultojnë në total 1,418,049 karta të emetuara nga bankat që operojnë në Shqipëri, nga 1,399,807 që rezultonin në mesin e vitit. Megjithatë, bie në sy se ato vijojnë të dominohen nga kartat e debitit, të cilat më së shumti përdoren për tërheqjen e pagave.
Në total numërohen 1,229,475 karta debiti, dhe vetëm 118,338 krediti. Edhe pse kanë shënuar një rritje të lehtë tremujorin e fundit numri i tyre mbetet ende në nivele minimale. Kartat e kreditit, në ndryshim nga ato të debitit, na mundësojnë të bëjmë blerje nga POS dhe interneti apo të tërheqim cash nga ATM/POS, brenda një kufiri të paracaktuar, pa pasur fonde në llogarinë tonë, por duke përdorur fondet që banka na ka vënë në dispozicion.
Rritje të lehtë ka shënuar këtë tremujor edhe numri i Kartave me funksion paraje elektronike, të cilat përdoren kryesisht për shlyerjen e faturave apo gjobave të ndryshme.
Megjithë rritjen përtej kuotës 1.4 milionë, përdorimi i kartave në vend vlerësohet në nivele të ulëta shkak për të cilin së shpejti do të hidhen në treg kartat bazike bankare. Muajt e fundit është miratuar edhe ligji që krijon lehtësira për kategori konsumatorësh të cilët e kanë të vështirë apo të pamundur hapjen dhe mbajtjen e një llogarie pagesash (rrjedhëse) në banka, për shkak të kostove që ajo mbart.
Paisja e tyre me kartë do të bëhet pa kosto ose me kosto të përballueshme prej tyre, duke garantuar dhe mundësuar të drejtën e çdo konsumatori, pavarësisht nivelit të të ardhurave, statusit të punësimit, historikut të aftësisë paguese, për të patur akses në shërbimet bazë të llogarisë së pagesës.
Ligji i ri krijon kushtet për mosdiskriminimin e konsumatorëve për hapjen e një llogarie pagese me shërbime bazike, por nga ana tjetër detyron edhe bankat për celjen e tyre.
Lorenc Rabeta/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.