320 mijë individë me llogari të shërbimeve bazike – BQK: Kategoritë e tjera, pagesë jo më shumë se 0.12% e pagës mujore

Banka Qendrore e Kosovës ka njoftuar se, bazuar në të dhënat e fundit të disponueshme, numri i llogarive me shërbime bazike ka kaluar shifrën prej 320 mijë përfituesish. Rregullorja përcakton se për kategoritë e konsumatorëve që i përkasin grupeve të cenueshme, si pensionistët dhe ata që përfitojnë asistencë sociale në Kosovë, nuk do të kenë tarifë, pra do të janë falas nga 1 janari 2024. Ndërsa, për kategoritë tjera, bankat do të ofrojnë shërbimet e përcaktuara me një tarifë të arsyeshme mujore që nuk mund të jetë më e lartë se 0.12% e vlerës së pagës mesatare neto mujore.

Procesi i konvertimit të llogarive rrjedhëse me shërbime bazike dhe hapjes së llogarive të reja, sipas kushteve të rregullores, është proces në vijim dhe nuk ka afat të përfundimit. BQK u bën thirrje qytetarëve të shfrytëzojnë të drejtën për të hapur llogari bankare në çdo bankë, duke përfituar nga ky lehtësim.

Në kuadër të një qasje proaktive, me qëllim lehtësimin e procesit dhe reduktimit të barrës për qytetarët, për të gjithë ata që tashmë kanë një llogari bankare dhe plotësojnë kriteret për llogari bazike, BQK bën verifikimin online nga çdo bankë.

Kjo mundëson që banka të verifikojë lehtësisht nëse një qytetar ka ose jo llogari tjetër bankare, që mundëson konvertimin me efikasitet në llogari bazike. Me draftin e ri për Sistemin e Pagesave, që është në proces të finalizimit, edhe institucionet financiare jobankare do të kenë të drejtë qasje në sistemin e kliringut të pagesave me vlerë të vogël, duke u mundësuar që të jenë konkurrues dhe efektivë në procesin e qarkullimit të pagesave në vend.

Ndërkohë, edhe në Shqipëri qeveria shqiptare ka ndërmarrë një nismë të njëjtë. Këshilli i Ministrave ka miratuar tashmë projektligjin për llogaritë bazike, që synon rritjen e depërtimit të shërbimeve bankare dhe financiare në populate, i cili hyri në fuqi në fillim të këtij viti. Objektivi i ligji është përcaktimi i rregullave dhe kushteve për hapjen dhe përdorimin e llogarive bankare për konsumatorët dhe rezidentët, pavarësisht nivelit të të ardhurave, statusit të punësimit apo historikut të aftësisë paguese brenda Republikës së Shqipërisë.

Gjithashtu, qëllimi i këtij ligji është garantimi i së drejtës për akses në një llogari pagese me shërbime bazike për konsumatorët, si një mjet i domosdoshëm për të mundësuar pjesëmarrjen e individëve në tregun financiar. Ende nuk ka një shifër se sa persona kanë përfituar nga ky ligj në Shqipëri, por sipas të dhënave të siguruara nga SCAN TV janë 73.950 pensionistë që marrin pensionin përmes bankave dhe 666.300 e marrin në postë. E thënë ndryshe, vetëm 10% e pensionistëve marrin pensionin përmes bankave tregtare dhe tashmë kanë përfituar shërbime me zero komision.

Lidion Kulla/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.