374,2 mln euro dërgesa emigrantësh në Kosovë – Por, ngadalësimi i Eurozonës pritet të tkurrë remitancat
Vlera e dërgesave të emigrantëve në Kosovë, llogaritet të ketë arritur në 374.2 milionë euro gjatë tremujorit të tretë të vitit të kaluar me një rritje prej 7.2% në bazë vjetore.
Sipas të dhënave nga Banka Qendrore, remitancat në Kosovë vijojnë të vijnë kryesisht nga Gjermania dhe Zvicra, që përbëjnë rreth 55% të totalit, ndjekur nga SHBA dhe vendet e tjera të Eurozonës.
Dërgesat e emigrantëve sipas kanaleve formale (bankat dhe institucionet e tjera) kanë shënuar rritje në vlerë prej 11.5 milionë euro, ndërsa është shënuar rritje prej 13.6 milionë euro në dërgesat përmes kanaleve joformale.
Duke konsideruar që pjesa me e madhe e remitancave jane me origjinë nga vendet e Eurozonës, rreth 60% e tyre, Banka Qendrore parashikon se ngadalësimi i aktivitetit ekonomik në Eurozonë dhe pasiguritë e rritura mund të kenë implikime mbi këtë zë të rëndësishëm për ekonominë e Kosovës.
Nga ana tjetër, investimet e huaja direkte gjatë tremujorit të tretë 2023 rezultojnë të kenë shënuar rënie prej 14.5%, duke arritur vlerën prej 245.2 milionë euro. Rënia është evidentuar kryesisht në pasuritë e paluajtshme, që mbetet sektori kryesor në këtë drejtim, me 6.2%, duke arritur vlerën prej 152.9 milionë euro. E kundërta ka ndodhur me aktivitetet e sigurimit dhe industrisë nxjerrëse, përfshirë guroret, ku është regjistruar rritje e investimeve të huaja direkte.
Dorian Koça/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.