750 euro gjobë për dyqanet me ajër të kondicionuar që nuk mbyllin dyert – Pas Gjermanisë edhe Franca mobilizohet për uljen e përdorimit të energjisë!
![](https://scantv.al/wp-content/uploads/2022/07/dyqan-france-700x383.jpg)
Qeveria franceze do të detyrojë të gjitha dyqanet me ajër të kondicionuar të mbyllin dyert dhe të fikin reklamat me ndriçim natën, në një përpjekje për të ulur përdorimin e energjisë.
Ministrja e Tranzicionit të Energjisë, Agnes Pannier-Runacher, thotë se është “absurde” që lënia e dyerve të hapura ndërkohë që ajri i kondicionuar është në punë mund të çojë në 20% më shumë konsum të energjisë.
Bizneset që thyejnë ndalimin, që do të hyjë në fuqi në ditët e ardhshme kur Pannier-Runacher të nxjerrë dekrete të reja, do të përballen me një gjobë prej 750 euro.
Disa qytete si Bourg-en-Bresse, Lyon, Besançon dhe Parisi kanë tashmë rregulla komunale në fuqi që nga mesi i korrikut, por tani qeveria dëshiron të zgjerojë iniciativën në të gjithë vendin.
Ndërsa një ndalim për reklamat me ndriçim midis orës 1 dhe 6 të mëngjesit zbatohet aktualisht në qytetet me më pak se 800,000 banorë, rregulloret e reja do ta bëjnë atë të zbatueshëm pavarësisht nga madhësia e popullsisë.
ANPCEN, një shoqatë franceze e cila bën fushatë kundër ndotjes nga drita, tha se sfida vjen në zbatimin e rregulloreve – gjë që aktualisht nuk ndodh vazhdimisht.
Konventa e Qytetarëve për Klimën e Presidentit Emmanuel Macron kishte propozuar kufizime edhe më ambicioze për ndotjen e dritës dhe përdorimin e energjisë elektrike, duke përfshirë ndalimin e të gjitha ekraneve të reklamave video në hapësirat publike dhe në transportin publik, por këto ide përfundimisht u refuzuan.
Edel Strazimiri / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.