Zhvillimi i turizmit natyror – Rihapet tenderi 430 mln lekë për ndërhyrje në Parkun Natyror të Liqenit të Ulzës
Transformimi i Parkut Natyror të Ulzës dhe zonave përreth, me qëllim rritjen e turizmit parashikohet të kushtojë rreth 430 mln lekë. Ministria e Turizmit dhe Mjedisit ka rihapur tenderin për zbatimin e projektit, që përfshin një sërë ndërhyrjesh infrastrukturore për ta kthyer në një atraksion tërheqës turistik. Fillimisht procedura e prokurimit publik u hap në shtator të vitit të kaluar, por ajo u anulua nga Komisioni i Prokurimit Publik, pas ankesës së operatorëve ekonomikë.
Ndërkaq, sipas dokumenteve shoqëruese parashikohet që përgjatë liqenit të Ulzës të ndërtohet një shëtitore, të ngrihen kulla vrojtimi, si dhe të ndërtohet qendra e pritjes së vizitorëve. Po ashtu, parashikohet të ndërtohet një rrugë dhe 2 pika panoramike e një sërë ndërhyrjesh të tjera.
Sipas dokumenteve, Parku Natyror “Liqeni I Ulzës” dhe zonat përreth tij ofrojnë një potencial shumë të mirë për zhvillimin e turizmit natyror, të kombinuar me kulinarinë, hiking, lundrimin në liqen, ejt.
Ndërkohë që, nëpërmjet këtij projekti synohet të realizohet ruajtja në gjendjen natyrore të peizazhit, sistemet ekologjike dhe karakteristikat natyrore të zonës. Po ashtu, pritet që plani dhe projekti i zbatimit të çojnë drejt zhvillimit të qendrueshëm të territorit, të kontrollit të zhvillimit, rritjes së mirëqenies së popullsisë vendase, punësimit, jetesës më të mirë dhe mbrotjes së aseteve natyrore e mjedisit.
Kompanitë e interesuara kanë vetëm 2 javë kohë për të dorëzuar dokumentet, ndërkohë që punimet pritet të zgjati 21 muaj, nga momenti i nënshkrimit të kontratës.
Ola Mitre/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.