Ulen humbjet e energjisë në rrjetin e shpërndarjes – Për janar – qershor raportohen në 17.69%, 2.19% më pak se 6-mujori 2023

Ola Mitre / SCAN

 

Niveli i humbjeve të energjisë në rrjetin e shpërndarjes për 6 – mujorin e parë të këtij viti u regjistrua në 17.69%, apo 2.19% më pak se e njëjta periudhë e vitit të kaluar, ku humbjet përllogariteshin në 19.88%. Të dhënat raportohen nga Enti Rregullator i Energjisë, teksa vetë Operatori i Shpërndarjes së Energjisë Elektrike ka bërë publik objektivin për uljen e sasisë së energjisë që humbet në rrjet në 17.93%, deri në fund të këtij viti.

Ky target konsiderohet ambicioz, duke marrë në konsideratë se tejkalon objektivat e vendosur nga qeveria për reduktimin e humbjeve. Sipas planit të rishikuar nga Këshilli i Ministrave, viti 2024 duhet të mbyllet me një nivel humbjesh prej 18.5% apo 0.57% më shumë sesa synohet të arrihet nga OSHEE. Po ashtu, sipas këtij plani, në vitin 2025 humbjet duhet të jenë në nivelin 18.1%, ndërsa në 2026-ën 17.8%.

Humbjet e energjisë në rrjet vijnë për 2 arsye. E para lidhet me rrjetin e amortizuar, që konsiderohen si humbje teknike, ndërsa e dyta përfshin humbjet joteknike apo thënë ndryshe vjedhjet. Në vitet e fundit niveli i humbjeve në rrjetin e shpërndarjes ka ardhur në ulje të lehtë, teksa viti 2023 u mbyll me një nivel prej 18.58 %.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.