Përdorimi i llavës vullkanike në ndërtim – Islanda propozon shndërrimin e substancës në material strukturor
Kristi Ceta/SCAN
Një studio arkitekture në Islandë ka propozuar përdorimin e llavës së vullkanit si material ndërtimi. Arnhildur Pálmadóttir do të prezantojë projektin e saj “Lavaforming” në Bienalen e Arkitekturës së Venecias vitin e ardhshëm. Ekipi i saj, i specializuar në qëndrueshmërinë në ndërtim, po eksploron se si ta kthejë substancën vullkanike në një material strukturor të qëndrueshëm.
Pálmadóttir e sheh procesin si një mënyrë për të kthyer një “kërcënim lokal” në një “burim të vlefshëm”. Projekti është një “propozim se si forca brutale e llavës mund të shndërrohet në një burim të vlefshëm, të aftë për të ulur emetimet atmosferike përmes përdorimit në të ardhmen si një material ndërtimi i qëndrueshëm”, shprehet ajo.
Arkitektja vëzhgoi se si vendndodhja e jashtëzakonshme gjeologjike e Islandës në një çarje midis dy pllakave tektonike shkakton aktivitet të shpeshtë sizmik duke përfshirë krijimin e fushave të gjera prej llave.
Përgjatë historisë, aktiviteti vullkanik i ishullit është perceptuar si një shqetësim lokal dhe një kërcënim për komunitetet. Pálmadóttir, e cila është nominuar për Çmimin Mjedisor të Këshillit Nordik 2024 për bashkëpunimin ndërdisiplinor në arkitekturë dhe fokusin e saj në materialet e riciklueshme të ndërtimit, dëshiron të transformojë llavën në “një burim që adreson një emergjencë globale”.
“Në historinë tonë, të vendosur në vitin 2150, ne do të kemi shfrytëzuar rrjedhën e llavës, ashtu siç bëmë me energjinë gjeotermike 200 vjet më parë në Islandë,” thotë Pálmadóttir.
Sipas arkitektes, “Qëllimi kryesor i “Lavaforming” është të tregojë se arkitektura mund të jetë forca që formëson një të ardhme të re me qëndrueshmëri, inovacion dhe mendim krijues”.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.