A e kërcënon Rusia Nato-n? – Analiza/ Ekuilibri i fuqisë ndërmjet dy vendeve dhe forcat e përfshira

Para 75 viteve, më 4 prill 1949, me iniciativën e 12 vendeve, përkatësisht Belgjikës, Kanadasë, Danimarkës, Francës, Islandës, Italisë, Luksemburgut, Holandës, Norvegjisë, Portugalisë, Mbretërisë së Bashkuar dhe Shteteve të Bashkuara, u krijua NATO. Në vitin 1952 u bashkua Turqia dhe Greqia, ndërkohë në vitin 1955 u bashkua dhe Gjermania. Më pas erdhën Spanja në vitin 1982 dhe Republika Çeke, Hungaria dhe Polonia në vitin 1999.

Organizata u zgjerua më tej në vitin 2004, ku u bashkuan Bullgaria, vendet Baltike, Rumania, Sllovakia dhe Sllovenia.  Pesë vite më vonë u bënë pjesë edhe vendi ynë e Kroacia. Mali i Zi u bë pjesë në vitin 2017-të, Maqedonia e Veriut ne vitin 2020, Finlanda në vitin 2023 dhe Suedia në vitin 2024. Deri më sot janë 32 anëtarë që duhet të përballen me sfidën e Rusisë, e cila ka kohë që është një problem jo vetëm për Ukrainën, por edhe për stabilitetin në botë.

Por sa kapacitet ka Rusia kundër NATO-s dhe a e kërcënon vërtetë? Përmes shifrave të NATO dhe Global Firepower, “Scan Intel” ka kryer një përballje të tyre duke marrë në konsideratë forcat ushtarake të secilit vend.

Janë marrë në analizë tregues që nga totali i personelit ushtarak, deri tek mjetet sipas llojit dhe artileria. Nga të dhënat shohim se NATO ka një numër dërrmues në krahasim me ato të Rusisë dhe në një konflikt “tradicional” askush nuk do të mendonte të sulmonte një armik që ka forca kaq superiore. Shifrat e përpunuara tregojnë se personeli ushtarak i Aleancës është 4 herë më i lartë se ai i Rusisë. Forcat ajrore po ashtu janë shumë herë më të larta se ato të Rusisë.

Por në cilat tregues Rusia qëndron përpara NATO-s? Rusia ka numër më të lartë të tankesh, me rreth 12,566, nga 12,408 që ka NATO. Po ashtu, Rusia kryeson në mjetet e lëshimit të raketave dhe korvetave, ose anijet e vogla luftarake. Theksojmë se këto janë të dhëna të marra nga burimet e përmendura më lart dhe mund të vihet në diskutim vërtetësia e disa prej treguesve, të cilat mund të jenë shumë sekrete.

Padyshim që çështja thelbësore në këtë mes është lufta përmes mjeteve bërthamore që Rusia ka në dispozicion dhe që presidenti rus ka kërcënuar vazhdimisht se do t’i përdorte nëse vendi i tij ndihej i kërcënuar. Do të ishte fillimi i Luftës së Tretë Botërore dhe fundi i njerëzimit.

Xhorxhina Deda/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.