Abonim mujor për 550 milionë përdorues të X – Musk hedh poshtë akuzat për përhapjen e urrejtjes dhe anti-semitizmit

X, platforma sociale e njohur më parë si Twitter, e kontrolluar prej gati një viti nga manjati Elon Musk, së shpejti do të prezantojë një formë abonimi mujor për rreth 550 milionë përdoruesit e saj. Njoftimi i politikës së re të kompanisë u përqendrua tek një pagesë të vogël mujore për përdorimin e platformës sociale X dhe vlerësimi zyrtar i përdoruesve të tweet-eve erdhi nga vetë Musk, gjatë një bisede me kryeministrin izraelit Benjamin Netanyahu mbi inteligjencën artificiale, ant-isemitizmin dhe planet e sipërmarrësit afrikano-jugor për X.

Musk gjithashtu u mbrojt kundër kritikave se ai dhe rrjeti i tij social përhapin gjuhë të urrejtjes dhe antisemitizëm, pasi kërcënoi se do të padiste Lidhjen Anti-Shpifje dhe bëri komente përçmuese për George Soros. Ai u shpreh se është kundër anti-semitizmit dhe se liria e fjalës ndonjëherë do të thotë të thuash diçka që të tjerëve nuk u pëlqen. Por, Musk premtoi se nuk do të promovojë gjuhën e urrejtjes.

Musk gjithashtu i bëri presion kryeministrit izraelit për reformën e tij në drejtësi. Miliarderi tha se u kritikua për takimin me Netanyahun pas reformës dhe demonstratave që ajo shkaktoi. Disa nga demonstruesit – u përgjigj Netanyahu – nuk e dinë se për çfarë po protestojnë dhe ka një përpjekje të përbashkët për t’u siguruar që ata të mos e dinë. Për Netanyahun, takimi kokë më kokë me Musk ishte një mundësi për të promovuar investimet teknologjike në Izrael, duke iu përgjigjur në këtë mënyrë kritikëve që pretendonin se reforma e miratuar në drejtësi do të largonte investitorët. Për Musk, biseda ishte një mundësi për të lehtësuar kritikat e hebrenjve amerikanë, sipas të cilëve nën drejtimin e tij X është bërë një mjet i urrejtjes antisemite.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.